కరీంనగర్‌లో పెళ్లి విషయంలో మనస్తాపం: యువతి మృతి, కేసు నమోదు

కరీంనగర్ జిల్లా సైదాపూర్ మండలం ఎలబోతరం గ్రామానికి చెందిన ఒక యువతి పెళ్లి విషయంలో మనస్తాపం చెంది మృతి చెందింది. ఆమె హైదరాబాద్‌లో నర్సింగ్ శిక్షణ తీసుకుంటోంది. ఘటనపై సైదాపూర్ పోలీస్ స్టేషన్‌లో కేసు నమోదు చేసి దర్యాప్తు చేపట్టారు.

పోలీసుల కథనం ప్రకారం, అదే గ్రామానికి చెందిన అక్షయ్‌తో ఆమెకు రెండేళ్లుగా పరిచయం ఉంది. అక్షయ్ గ్రామంలో ఆటో నడుపుతూ వ్యవసాయం చేసుకుంటున్నాడు. పెళ్లి గురించి ఆమె అడిగినప్పుడు అతను నిరాకరించాడని కుటుంబం చెప్తోంది.

అక్టోబర్ 24న కుటుంబ సభ్యులు ఇంట్లో లేని సమయంలో ఆమె ఆత్మహత్యాయత్నానికి పాల్పడింది. స్థానికుల సహాయంతో ఆమెను హుజూరాబాద్ ప్రభుత్వ ఆసుపత్రికి తరలించారు. తర్వాత జమ్మికుంటలోని ప్రైవేట్ ఆసుపత్రి, ఆపై మెరుగైన చికిత్స కోసం కరీంనగర్ ఆదర్శ ఆసుపత్రికి తీసుకెళ్లారు.

నాలుగు రోజుల చికిత్స తర్వాత ఆమె మృతి చెందినట్టు పోలీసులు తెలిపారు. పెళ్లి చేసుకుంటానని నమ్మించి మోసం చేశాడని ఆరోపిస్తూ ఆమె తల్లి పోలీసులకు ఫిర్యాదు చేసింది. ఈ ఫిర్యాదు మేరకు కేసు నమోదు చేశామని, దర్యాప్తు జరుగుతోందని పోలీసులు తెలిపారు. ఈ ఆరోపణలపై అక్షయ్ వైపు నుంచి స్పందన లభ్యం కాలేదు.

ఎలాంటి అవాంఛనీయ ఘటనలు జరగకుండా గ్రామంలో పోలీసు బందోబస్తు ఏర్పాటు చేశారు. ఇరు కుటుంబాల ఇళ్ల వద్ద పోలీసులను మోహరించారు. దర్యాప్తు కొనసాగుతోంది.