ఫార్చునర్ కారులో డ్యూటీకి వచ్చే కర్ణాటక పారిశుద్ధ కార్మికుడు

కర్ణాటకలోని మంగళూరు సమీపంలో ఉన్న బంట్వాళ మున్సిపాలిటీకి చెందిన శేషప్ప అనే పారిశుద్ధ కార్మికుడు ఫార్చునర్ కారులో డ్యూటీకి వస్తున్న వీడియో సోషల్ మీడియాలో వైరల్ అయింది. 1996 నుంచి ఆయన మున్సిపాలిటీలో పనిచేస్తున్నారు.

తోటి కార్మికులు సైకిల్ లేదా బైక్‌పై పనికి రాగా, శేషప్ప మాత్రం ఫార్చునర్ కారులో వచ్చి తన విధులు నిర్వహిస్తున్నారు. గతంలో ఆయన మద్యానికి బానిస అయి కుటుంబాన్ని నిర్లక్ష్యం చేశారని, స్థానిక పోలీస్ అధికారి బెల్లియప్ప ఇచ్చిన సలహాతో జీవితం మార్చుకున్నారని తెలిసింది.

ఆ తర్వాత బ్యాంకు లోన్తో చిన్న కారు కొన్నారు. ఆ తర్వాత రెండో చేతి మహీంద్రా కారుకు మారారు. చివరకు ఫార్చునర్ కొనుగోలు చేశారు. ఉదయం మున్సిపాలిటీలో పనిచేసే ఆయన మధ్యాహ్నం, సాయంత్రం పాడి పరిశ్రమ నిర్వహిస్తున్నారు. ఆవులను పెంచి పాలు అమ్ముతున్నారు. దీని ద్వారా నెలకు సుమారు రూ.40,000 ఆదాయం వస్తున్నట్టు చెప్పారు.

మున్సిపాలిటీ జీతం, పాడి వ్యాపార ఆదాయం కలిపి ఇన్వెస్ట్ చేసి కారు కొన్నట్టు శేషప్ప తెలిపారు. పని ఏదైనా గౌరవంగా చేయాలని ఆయన అంటున్నారు.