ట్రంప్‌తో ఫోన్ కాల్‌లో లౌడ్ స్పీకర్ ప్రయోగం.. JLR ఉద్యోగాలు కాపాడిన కీర్ స్టార్మర్

UK ప్రధాని కీర్ స్టార్మర్ అమెరికా అధ్యక్షుడు డొనాల్డ్ ట్రంప్‌తో జరిగిన ఓ ఫోన్ సంభాషణ వివరాలు ఇప్పుడు వైరల్‌గా మారాయి. సోలిహల్‌లోని జాగ్వార్ ల్యాండ్ రోవర్ (JLR) ఫ్యాక్టరీలో కార్మికుల మధ్య నిలబడి ట్రంప్ కాల్ అందుకున్నట్లు, ఆ సమయంలో ఫోన్‌ను లౌడ్ స్పీకర్‌లో పెట్టడం తన చేసిన ఏకైక పొరపాటు అని స్టార్మర్ హాస్యంగా చెప్పారు. టారిఫ్‌ల ముప్పు నేపథ్యంలో JLR కార్మికులు తీవ్ర ఆందోళనలో ఉన్న తరుణంలో ఈ ఒప్పందం కుదిరింది.

పార్లమెంటులో ప్రసంగిస్తూ స్టార్మర్ ఈ విషయాన్ని వెల్లడించారు. ‘ట్రెవర్, లూయీస్ వంటి 30 ఏళ్ల అనుభవం ఉన్న కార్మికుల ముందు ట్రంప్‌తో మాట్లాడుతున్నప్పుడు లౌడ్ స్పీకర్ ఆన్ చేయడం కొంచెం ప్రమాదకరమే. కానీ అదృష్టవశాత్తూ ట్రంప్ ఒప్పందాన్ని అంగీకరించారు. కార్మికులు హర్షధ్వానాలు చేశారు’ అని ఆయన వివరించారు. ఈ వ్యాఖ్యలు సోషల్ మీడియాలో తీవ్ర చర్చనీయాంశమయ్యాయి.

JLR అనేది టాటా మోటార్స్ అనుబంధ సంస్థ అన్న విషయం భారతీయులకు ప్రత్యేక ఆసక్తిని కలిగిస్తుంది. ట్రంప్ ప్రభుత్వం ప్రతిపాదించిన టారిఫ్‌లు అమలైతే UKలోని భారీ కార్మిక శక్తికి ప్రమాదం పొంచి ఉంది. టాటా సంస్థకు చెందిన ఈ కర్మాగారంలో వేలాది మంది ఉపాధి పొందుతున్నారు. స్టార్మర్ ప్రయత్నాలతో ఆ ముప్పు తప్పింది.

ట్రంప్‌తో ఫోన్‌లో మాట్లాడుతూ లౌడ్ స్పీకర్‌లో పెట్టడం నిజంగా ఒక ప్రమాదమేనని, అయినా అది కార్మికుల భవిష్యత్తుకు భరోసా ఇచ్చే ఘట్టంగా మారిందని స్టార్మర్ సంకేతాలు ఇచ్చారు. ప్రస్తుతం ఈ దృశ్యాలు UK రాజకీయాల్లో హాట్ టాపిక్‌గా నిలిచాయి.