కేరళ ఆలయాల్లో రోబోటిక్ ఏనుగులు: సంప్రదాయానికి సాంకేతిక ప్రత్యామ్నాయం

కేరళలోని ఆలయాల్లో ఇకపై నిజమైన ఏనుగుల స్థానంలో రోబోటిక్ ఏనుగులను వినియోగిస్తున్నారు. దూరం నుంచి చూస్తే నిజమైన ఏనుగులా కనిపించే ఈ యంత్ర ఏనుగు చెవులు ఆడిస్తుంది, తోక తిప్పుతుంది, తొండం మీదుగా ఆశీర్వాదం కూడా అందిస్తుంది.

ఈ ప్రాజెక్టుకు సాంకేతిక నిపుణుడు ప్రశాంత్ ప్రకాశన్ నేతృత్వం వహిస్తున్నారు. ఒక్కో రోబోటిక్ ఏనుగు తయారీకి దాదాపు రూ.5 లక్షలు ఖర్చవుతుంది. ఫైబర్ గ్లాస్ మౌల్డ్లతో బాడీని, రబ్బరుతో కదిలే భాగాలను రూపొందిస్తారు. చర్మం మడతలు, చెవుల్లో నరాలు వంటి వివరాలన్నీ సహజంగా కనిపించేలా చెక్కుతారు. ఒక ఏనుగును 15 రోజుల్లో సిద్ధం చేస్తారు. ప్రస్తుతం నిలబడే ఏనుగులనే తయారు చేస్తున్న ఈ బృందం, భవిష్యత్తులో నిజంగా నడిచే ఏనుగులను తయారు చేయాలని లక్ష్యంగా పెట్టుకుంది.

జంతువులపై హింసను నివారించడం, ఏనుగుల నిర్వహణకు అయ్యే భారీ ఖర్చును తగ్గించడం ఈ సాంకేతికత వెనుక ఉన్న ఉద్దేశ్యమని తయారీదారులు తెలిపారు. కేరళలో దాదాపు 400, దేశవ్యాప్తంగా 2500కి పైగా ఆలయ ఏనుగులు ఉన్నాయి. ఈ రోబోటిక్ ఏనుగులకు ప్రపంచవ్యాప్తంగా డిమాండ్ పెరుగుతుండగా, ఉత్తర అమెరికా, దుబాయ్ వంటి దేశాలకు వీటిని ఎగుమతి చేస్తున్నారు.

కాగా, కొందరు సంప్రదాయవాదులు ఈ మార్పును వ్యతిరేకిస్తున్నారు. ఏనుగును వినాయకుడి స్వరూపంగా శుభసూచకంగా భావిస్తామని, యంత్రాలు నిజమైన ఏనుగు స్థానాన్ని భర్తీ చేయలేవని కేరళ ఆలయ అధికారులు వ్యాఖ్యానించారు.