కేతన్ అగర్వాల్ హత్య కేసు: సియా గోయల్‌కు జ్యుడిషియల్ కస్టడీ, కోడ్ పదాలపై పోలీసుల విచారణ

పూణేలో కేతన్ అగర్వాల్ (30) హత్య కేసులో నిందితులైన అతని కాబోయే భార్య సియా గోయల్, ఆమె స్నేహితుడు చేతన్ చౌదరీలను పూణే కోర్టు 14 రోజుల జ్యుడిషియల్ కస్టడీకి పంపింది. పోలీసులు కోరిన కస్టడీ పొడిగింపు అభ్యర్థనను కోర్టు తిరస్కరించింది. వీరిద్దరినీ జూలై 16 వరకు జ్యుడిషియల్ కస్టడీలో ఉంచాలని న్యాయమూర్తి ఆదేశించారు.

పోలీసులు మరో మూడు రోజుల కస్టడీ పొడిగింపు కోరుతూ కోర్టుకు నివేదించారు. సియా, చేతన్‌ల మధ్య జరిగిన సంభాషణల్లో 'కోడ్ వర్డ్స్' (code words) ఉపయోగించినట్లు దర్యాప్తులో తేలిందని, వాటి అసలు అర్థాన్ని వివరించేది వీరిద్దరేనని పోలీసులు వాదించారు. అయితే, మరింత కస్టడీ ఇంటరాగేషన్ అవసరం లేదని కోర్టు భావించింది. ఈ కేసులో కీలక ఆధారాలు ఉండే అవకాశం ఉన్న సియా రెండో మొబైల్ ఫోన్‌ను పోలీసులు స్వాధీనం చేసుకున్నారు.

హత్యకు ముందు కేతన్‌కు సియా-చేతన్‌ల సంబంధంపై అనుమానాలు ఉండేవి. ఎంగేజ్‌మెంట్ తర్వాత సియా ఫోన్ తరచూ బిజీగా ఉండడం, చేతన్ గురించి తరచూ ప్రస్తావించడంతో కేతన్ తన కుటుంబ సభ్యులకు ఆమె నేపథ్యాన్ని పూర్తిగా పరిశీలించాలని చెప్పాడు. చిన్న చిన్న విషయాలపై గొడవల కారణంగా బాలి ట్రిప్ రద్దు చేసుకున్నారు. అదే సమయంలో కేతన్ పాస్పోర్ట్ అదృశ్యం కావడం, అందుకు సియానే కారణమని అనుమానం వ్యక్తమైంది. కుటుంబ సభ్యులు మాత్రం అన్నీ సవ్యంగా ఉంటాయని కేతన్‌కు ధైర్యం చెప్పారు.

ప్రస్తుతం ఈ కేసు దర్యాప్తు కొనసాగుతోంది. జూలై 16 వరకు నిందితులు జ్యుడిషియల్ కస్టడీలో ఉండనున్నారు.