కోనసీమలో సముద్రం నల్లగా మారడంతో మత్స్యకారుల ఆందోళన

డాక్టర్ బీఆర్ అంబేద్కర్ కోనసీమ జిల్లా మలికీపురం మండలం కేసనపల్లి తూర్పుపాలెం సముద్ర తీరంలో నీరు ఒక్కసారిగా నల్లగా మారింది. సముద్రంపై నల్లటి చమురు మాదిరి పదార్థం తేలడంతో స్థానిక మత్స్యకారులు తీవ్ర ఆందోళన వ్యక్తం చేశారు.

సముద్రంలో ONGC చేపడుతున్న తవ్వకాల కార్యకలాపాలే ఈ కాలుష్యానికి కారణమని మత్స్యకారులు ఆరోపిస్తున్నారు. దీనివల్ల ఎర్ర పీతలు, పులస చేపల వంటి విలువైన మత్స్య సంపద కనుమరుగైందని, చేపల వేటపై ఆధారపడిన వేలాది కుటుంబాలు ఉపాధి కోల్పోతున్నాయని వారు వాదిస్తున్నారు.

తీరంలో పదేపదే ఇలాంటి నల్లటి పదార్థం కనిపించడంతో మత్స్యకారులు తీవ్ర నష్టంలో ఉన్నారు. ONGC కార్యకలాపాలను వెంటనే నిలిపివేయాలని, నష్టపోయిన కుటుంబాలకు ప్రభుత్వం ప్రత్యేక ఆర్థిక సహాయం ప్రకటించాలని బాధితులు డిమాండ్ చేస్తున్నారు.

ఈ ఘటనపై ONGC నుంచి ఇప్పటివరకు ఎటువంటి స్పందన లేదు. సంబంధిత అధికారులపై విచారణ చేపట్టాలని మత్స్యకార సంఘాలు కోరుతున్నాయి.