వానాకాలం వరి సాగులో కలుపు, ఎరువుల యాజమాన్యంపై కృషి విజ్ఞాన కేంద్రం సూచనలు

శ్రీకాకుళం జిల్లా ఆముదాలవలస కృషి విజ్ఞాన కేంద్రం శాస్త్రవేత్త డాక్టర్ అనూష, ఖరీఫ్ వరి సాగులో రైతులు పాటించాల్సిన కలుపు, ఎరువుల యాజమాన్య పద్ధతులను వివరించారు.

నాట్లు వేసే పద్ధతిలో సాగు చేసేవారు ప్రధాన పొలాన్ని 3-4 సార్లు దమ్ము చేసి చదును చేయాలి. ఆఖరి దుక్కిలో 150 కిలోల సింగిల్ సూపర్ ఫాస్ఫేట్ లేదా 50 కిలోల డీఏపీ, 13 కిలోల మ్యూరేట్ ఆఫ్ పొటాష్ వేసుకోవాలి. 25-30 రోజుల వయసున్న నారును నాటుకోవాలి. నారు మొనలు తుంచి నాటితే కాండం తొలిచే పురుగు, హిస్పా వంటి చీడల బెడద తగ్గుతుంది. ప్రతి 2 మీటర్లకు 20 సెం.మీ కాలిబాట ఏర్పరచుకుంటే గాలి ప్రసరణ, పురుగు మందుల పిచికారీ సులభం.

నాటిన 3-5 రోజుల్లో కలుపు నివారణకు పలుచని నీరు పెట్టి, ఎకరానికి 1-1.25 లీటర్ బ్యూటాక్లోర్ 50% ఈసీ లేదా 400 మి.లీ ప్రెటిలాక్లోర్ 50% ఈసీ లేదా 4 కిలోల బెన్సల్ఫ్యూరాన్ మిథైల్ 0.6% + ప్రెటిలాక్లోర్ 6% గుళికలను 20-25 కిలోల ఇసుకలో కలిపి చల్లాలి.

వెద పద్ధతిలో సాగు చేసే రైతులు సిఫార్సు చేసిన భాస్వరం ఎరువు మొత్తం, సగం పొటాష్ ఎరువు ఆఖరి దుక్కిలో వేయాలి. నత్రజనిని మాత్రం దుక్కిలో వేయకూడదు. విత్తిన 15-20 రోజులకు 23 కిలోల యూరియా, 40-45 రోజులకు రెండో దఫా 23 కిలోలు, 60-65 రోజులకు మూడో దఫా 23 కిలోల యూరియా + 13 కిలోల ఎంఓపీ వేయాలి. కలుపు నివారణకు విత్తిన వెంటనే పెండిమెథలిన్ 30% ఈసీ 1 లీటరు లేదా విత్తిన 3-7 రోజులకు ప్రెటిలాక్లోర్ + సెఫేవర్ 50% 600 మి.లీ లేదా బెన్సల్ఫ్యూరాన్ మిథైల్ + ప్రెటిలాక్లోర్ గుళికలు 4 కిలోలు ఇసుకతో చల్లాలి.

సూక్ష్మ ధాతు లోపాలు కనిపిస్తే వెంటనే చర్యలు తీసుకోవాలి. జింకు లోపం లక్షణాలు – ఆకు ఈనె పాలిపోవడం, తుప్పు రంగు మచ్చలు, మొక్క గిడసబారడం. దీనికి 2 గ్రాముల జింక్ సల్ఫేట్ లీటర్ నీటికి కలిపి 5 రోజుల వ్యవధిలో రెండు సార్లు పిచికారి చేయాలి. ఇనుప ధాతు లోపంలో చిగుళ్ళు తెల్లబడి ఇటుక రంగు మచ్చలు ఏర్పడతాయి. 20 గ్రాముల అన్నభేది, 2 గ్రాముల నిమ్మ ఉప్పు లీటరు నీటికి కలిపి పిచికారి చేయాలి.

అకాల వర్షాలకు నారుమడి లేదా పొలం మునిగితే నీటిని వెంటనే బయటకు పంపించాలి. నారుమడికి 5 సెంట్లకు 1 కిలో యూరియా, 1 కిలో ఎంఓపీ వేయాలి. నాట్లు వేసిన పొలం ముంపుకు గురైతే నీటిని తీసిన తర్వాత ఎకరానికి 20 కిలోల యూరియా, 20 కిలోల ఎంఓపీ బూస్టర్ డోస్ వేసి, 1 గ్రాము కార్బండజిం లీటరు నీటికి కలిపి పిచికారి చేస్తే తెగుళ్ళ నుంచి రక్షణ లభిస్తుంది.