100 రోజుల్లో 200 టీఎంసీల నీటి లిఫ్టింగ్: కేటీఆర్

BRS నేత కేటీ రామారావు (KTR) శుక్రవారం ఒక ప్రకటనలో, కన్నెపల్లి పంప్‌హౌస్ నుంచి 100 రోజుల్లో 200 టీఎంసీల నీటిని గోదావరి నుంచి లిఫ్ట్ చేయొచ్చని చెప్పారు. ఈ విషయం తెలంగాణ రిటైర్డ్ ఇంజనీర్ల సంఘం అధ్యయనం ఆధారంగా తెలిపారు.

ఆయన వివరాల ప్రకారం, కన్నెపల్లి వద్ద నది ప్రవాహం 93.5 మీటర్లు నమోదైతే పంపులు ఆన్ చేయొచ్చు. జూలై 11న అక్కడ 96.79 మీటర్ల ప్రవాహం ఉంది. గత 50-60 ఏళ్ల డేటా ప్రకారం అక్టోబర్ వరకు ఇదే స్థాయి ప్రవాహం ఉంటుందని CWC నివేదిక సూచిస్తోంది. ఈ 100 రోజుల వ్యవధిలో రోజుకు 2 టీఎంసీల చొప్పున లిఫ్టింగ్ చేస్తే మొత్తం 200 టీఎంసీల నీరు లభిస్తుందని కేటీఆర్ లెక్కగట్టారు.

ఈ నీటితో మిడ్ మానేర్, లోవర్ మానేర్, ఎస్ఆర్ఎస్పి, మల్లన్న సాగర్, కొండపోచమ్మ సాగర్, అనంతగిరి, మల్కాపేట్, బసవాపూర్ రిజర్వాయర్లు నిండుతాయని వివరించారు. మేడిగడ్డ బ్యారేజీ గేట్లను తెరవకుండానే ఈ లిఫ్టింగ్ సాధ్యమని ఆయన స్పష్టం చేశారు.

ముఖ్యమంత్రి రేవంత్ రెడ్డి ఈ అవకాశాన్ని పరిగణలోకి తీసుకోవాలని కేటీఆర్ విజ్ఞప్తి చేశారు. ఈ విషయంపై రాష్ట్ర ప్రభుత్వం స్పందన ఇంకా లేదు.