ఎస్ఐఆర్ ఫారంలో 2002 వివరాలు తప్పనిసరి కాదు: జోనల్ కమిషనర్ వికాస్ మహతో

ఎస్ఐఆర్ (Summary Revision) ఫారం నింపే సమయంలో 2002 నాటి తల్లిదండ్రులు, తాతల ఓటర్ వివరాలు తప్పనిసరి కాదని ఎల్బీ నగర్ జోనల్ కమిషనర్ వికాస్ మహతో తెలిపారు. 2002 వివరాలు లేని వారు ఆ ఫీల్డ్‌లు ఖాళీగా ఉంచి ఫారం సబ్మిట్ చేయవచ్చన్నారు.

ఫారంలోని మూడో భాగంలో ప్రస్తుత వివరాలు (తండ్రి పేరు, తల్లి పేరు, మొబైల్ నంబర్, ఆధార్) నింపితే సరిపోతుందని ఆయన వివరించారు. 2002 వివరాలు లేవని ఫారం సబ్మిట్ చేయకుండా ఆలస్యం చేయొద్దని ప్రజలకు సూచించారు.

2002 వివరాలు ఇవ్వని వారికి ఆగస్టులో నోటీసులు వస్తాయని, అప్పుడు ఎన్నికల కమిషన్ సూచించిన 11 గుర్తింపు పత్రాల్లో ఏదో ఒకటి చూపిస్తే సరిపోతుందని కమిషనర్ చెప్పారు.

బిఎల్ఓలకు ఫారాలను వీలైనంత త్వరగా సేకరించేలా సూచనలు ఇచ్చామన్నారు. వివరాలు లేని వారు వెంటనే ప్రాథమిక వివరాలు రాసి ఫారం ఇవ్వాలని, లేకుంటే ఓటు హక్కు పోయే ప్రమాదం ఉంటుందని హెచ్చరించారు.