బంగాళాఖాతంలో అల్పపీడనం: ఉత్తరాంధ్ర, తెలంగాణకు భారీ వర్ష సూచన, పలు జిల్లాలకు అలర్ట్

బంగాళాఖాతంలో ఏర్పడిన అల్పపీడనం కారణంగా ఉత్తరాంధ్ర, తెలంగాణలో భారీ వర్షాలు కురుస్తాయని వాతావరణ సంస్థలు హెచ్చరించాయి. ఏపీ విపత్తుల నిర్వహణ సంస్థ ఈ విషయాన్ని వెల్లడించింది.

ఏపీ విపత్తుల నిర్వహణ సంస్థ హెచ్చరికల ప్రకారం ఉత్తరాంధ్రలో భారీ వర్షాలు కురుస్తాయి. సముద్రం అల్లకల్లోలంగా ఉంటుంది. తీర ప్రాంతాల్లో గంటకు 40 నుంచి 50 కిలోమీటర్ల వేగంతో గాలులు వీస్తాయి. జిల్లా యంత్రాంగాన్ని అప్రమత్తంగా ఉండాలని సూచించారు. లోతట్టు ప్రాంతాలపై ప్రత్యేక దృష్టి పెట్టాలని అన్ని శాఖలకు చెప్పారు.

హైదరాబాద్ వాతావరణ కేంద్రం తెలంగాణలో పలు జిల్లాలకు హెచ్చరికలు జారీ చేసింది. కొమరం భీమ్ ఆసిఫాబాద్, మంచిర్యాల, పెద్దపల్లి, జయశంకర్ భూపాలపల్లి జిల్లాల్లో భారీ నుంచి అతి భారీ వర్షాలు పడొచ్చు. ఈ జిల్లాలకు ఆరెంజ్ అలర్ట్ ఇచ్చారు. ఆదిలాబాద్, నిర్మల్, నిజామాబాద్, జగిత్యాల, కామారెడ్డి, రాజన్న సిరిసిల్ల, మెదక్ జిల్లాలకు ఎల్లో అలర్ట్ ఇచ్చారు.

IMD అధికారి శ్రావణి మాట్లాడుతూ గత 24 గంటల్లో కొమరం భీమ్ ఆసిఫాబాద్, జగిత్యాల జిల్లాల్లో 5 నుంచి 6 సెంటీమీటర్ల వర్షం పడిందని తెలిపారు. అల్పపీడనంతో పాటు ఒక ద్రోణి కూడా కొనసాగుతోందని వివరించారు. ఈ ప్రభావంతో ఈ వారం పొడవునా రాష్ట్రంలో మోస్తరు నుంచి భారీ వర్షాలు కురుస్తాయని చెప్పారు. హైదరాబాద్‌లో పగలు మేఘావృత వాతావరణం ఉంటుంది. రాత్రి మోస్తరు వర్షం కురిసే అవకాశం ఉంది.

ఈ నెల 21 వరకు రాష్ట్రంలో వర్షపాతం సాధారణం కంటే తక్కువగా నమోదైంది. ప్రస్తుతం monsoon స్థితి -18% వద్ద ఉంది. ఈ వారం కురిసే వర్షాలు లోటును కొంత తగ్గించొచ్చని IMD అధికారులు అంచనా వేశారు.