మహారాష్ట్రలో లూజ్ వంట నూనె విక్రయాలపై నిషేధం; సీల్డ్ ప్యాకెట్లలోనే అమ్మకం

మహారాష్ట్రలో లూజ్ (ప్యాకెట్ లేని) వంట నూనె అమ్మకాలను రాష్ట్ర ఫుడ్ అండ్ డ్రగ్ అడ్మినిస్ట్రేషన్ (FDA) నిషేధించింది. ఇకపై దుకాణాల్లో ప్యాకెట్ లేకుండా వంట నూనె విక్రయించడం కుదరదు.

FDA రాష్ట్రవ్యాప్తంగా 14 అంశాలతో కొత్త ఆదేశాలు జారీ చేసింది. తయారీదారులు, డిస్ట్రిబ్యూటర్లు, రిటైలర్లు, ఆన్లైన్ విక్రేతలపై ఈ నిబంధనలు వర్తిస్తాయి. వంట నూనెను సీల్డ్, టాంపర్ ప్రూఫ్, పూర్తి లేబులింగ్ ఉన్న ప్యాకెట్లలో మాత్రమే అమ్మాలని ఆదేశాలు చెబుతున్నాయి. దుకాణంలో డబ్బా నుంచి కిలో నూనె కొలిచి ఇచ్చే పద్ధతికి చెక్ పడింది.

2025-26లో FDA 1,247 వంట నూనె శాంపిల్స్ పరీక్షించింది. వాటిలో 1,142 శాంపిల్స్ ప్రమాణాలకు అనుగుణంగా ఉన్నాయి. 77 సబ్ స్టాండర్డ్, 13 మానవ వినియోగానికి అన్సేఫ్, 15 మిస్ బ్రాండెడ్ గా గుర్తించారు. నిబంధనలకు విరుద్ధంగా ఉన్న నూనెపై చర్యల్లో భాగంగా అధికారులు సుమారు 3.2 లక్షల కిలోల నూనె స్టాక్ స్వాధీనం చేసుకున్నారు. దీని విలువ దాదాపు ₹5.3 కోట్లు.

లూజ్ నూనెలో నాణ్యత, మూలం, నిల్వ పరిస్థితులను వినియోగదారుడు స్వయంగా నిర్ధారించడం కష్టం. కొనుగోలు చేసేటప్పుడు బ్రాండ్ పేరు, లేబులింగ్, సీల్ సరిగ్గా ఉన్నాయా అని చూడాలని అధికారులు సూచిస్తున్నారు. ప్రస్తుతం ఈ ఆదేశం మహారాష్ట్ర రాష్ట్రవ్యాప్తంగా అమల్లోకి వచ్చింది. ఇతర రాష్ట్రాలు ఇదే తరహా నిబంధనలు తీసుకురావడంపై చర్చ మొదలైంది.