మహేష్ బాబు పుట్టినరోజు: 'వారణాసి' నుంచి స్పెషల్ వీడియోపై ఆసక్తి

నటుడు మహేష్ బాబు, దర్శకుడు ఎస్ఎస్ రాజమౌళి కాంబినేషన్లో తెరకెక్కుతున్న 'వారణాసి' సినిమా 2027 ఏప్రిల్ 7న ప్రపంచవ్యాప్తంగా విడుదల కానుంది. విడుదల తేదీ కేవలం 10 నెలల దూరంలో ఉండటంతో, ప్రమోషనల్ కార్యక్రమాలు వేగం పుంచుకోవాలని అభిమానులు ఆశిస్తున్నారు. ముఖ్యంగా, మహేష్ బాబు పుట్టినరోజు (ఆగస్టు 9) సందర్భంగా ఈ చిత్రం నుంచి ఏదైనా అప్‌డేట్ ఉంటుందా అనేది ఇప్పుడు చర్చనీయాంశంగా మారింది.

గత ఏడాది మహేష్ బాబు పుట్టినరోజు నాడు 'వారణాసి' టీమ్ నుంచి ఎలాంటి కంటెంట్ విడుదల కాలేదు. దీంతో అభిమానులు కొంత నిరాశ చెందారు. ఆ తర్వాత నవంబర్‌లో 'ఫస్ట్ గ్లిమ్స్' వీడియోను రిలీజ్ చేయగా, దానికి మంచి స్పందన లభించింది. ఈసారి మాత్రం మహేష్ బాబు పుట్టినరోజు సందర్భంగా కనీసం ఒక చిన్న టీజర్ లేదా రుద్ర పాత్రకు సంబంధించిన ప్రత్యేక వీడియో విడుదల చేయాలని అభిమానులు సోషల్ మీడియాలో డిమాండ్ చేస్తున్నారు.

దర్శకుడు రాజమౌళి కంటెంట్ నాణ్యతకు ఎక్కువ ప్రాధాన్యం ఇస్తారు. పూర్తిగా సిద్ధమైన కంటెంట్ మాత్రమే విడుదల చేయడం ఆయనకు అలవాటు. అందువల్ల, ఆగస్టు 9న ఏమైనా స్పెషల్ ట్రీట్ ఇస్తారా లేదా అనేది పూర్తిగా రాజమౌళి సన్నద్ధతపై ఆధారపడి ఉంటుంది.

పౌరాణిక అంశాలతో యాక్షన్ అడ్వెంచర్ నేపథ్యంలో రూపొందుతున్న ఈ చిత్రంలో మహేష్ బాబుతో పాటు ప్రియాంక చోప్రా, పృథ్విరాజ్ సుకుమారన్ కీలక పాత్రలు పోషిస్తున్నారు. ఈ పాన్ వరల్డ్ ప్రాజెక్ట్ 2027 ఏప్రిల్ 7న థియేటర్లలో సందడి చేయనుంది.