మొక్కజొన్నలో అధిక దిగుబడికి సమగ్ర యాజమాన్యం: KVK శాస్త్రవేత్త సూచనలు

ఆంధ్రప్రదేశ్ లోని ఉత్తర కోస్తా జిల్లాల్లో వర్షాధారంగా మొక్కజొన్న సాగు విస్తీర్ణం ఏటా పెరుగుతోంది. వరి తర్వాత ఎక్కువగా ఈ పంటను రైతులు సాగు చేస్తున్నారు. ప్రస్తుతం విత్తిన పంట 10 నుంచి 40 రోజుల దశలో ఉంది. ఈ సమయంలో సమగ్ర యాజమాన్యం పాటించడం ద్వారా అధిక దిగుబడి సాధించవచ్చని శ్రీకాకుళం జిల్లా ఆముదాలవలస కృషి విజ్ఞాన కేంద్రం (KVK) శాస్త్రవేత్త అనూష తెలిపారు.

ఆమె సూచనల ప్రకారం, ఎకరానికి 8 నుంచి 10 కిలోల విత్తనం సరిపోతుంది. విత్తన శుద్ధి చేయడం తప్పనిసరి. కత్తెర పురుగు నివారణకు సయాన్ప్రోల్ ప్లస్ తయమితాక్సాం కలిపిన మందును కిలో విత్తనానికి 6 మి.లీ. చొప్పున, ఎండు తెగులు రాకుండా ట్రైకోడర్మా విరిడేను కిలో విత్తనానికి 10 గ్రాముల చొప్పున విత్తన శుద్ధి చేయాలి. నాటేటప్పుడు వరుసల మధ్య 60 సెం.మీ., మొక్కల మధ్య 20 సెం.మీ. ఎడం ఉండేలా చూడాలి. బోదె ఎత్తులో 1/3 వంతు ఎత్తులో విత్తనం నాటితే నీరు నిల్వ ఉండకుండా ఉంటుంది.

ఎరువుల విషయానికి వస్తే, ఎకరాకు 70-80 కిలోల నత్రజని అవసరం. ఇందుకు 173 కిలోల యూరియా, 150 కిలోల సింగిల్ సూపర్ ఫాస్ఫేట్ (24 కిలోల భాస్వరం), 20 కిలోల పొటాష్ కోసం 33 కిలోల మ్యూరేట్ ఆఫ్ పొటాష్, 20 కిలోల జింక్ సల్ఫేట్ వేయాలి. యూరియాను మూడు దఫాలుగా, పొటాష్‌ను రెండు దఫాలుగా అందించాలి. చివరి దుక్కిలో 57 కిలోల యూరియా, మొత్తం భాస్వరం, సగం పొటాష్, జింక్ సల్ఫేట్‌లను విడివిడిగా కలియదున్నాలి. 30-35 రోజులకు 57 కిలోల యూరియా, 50-55 రోజులకు 57 కిలోల యూరియాతో పాటు మిగిలిన పొటాష్ వేయాలి.

కలుపు నివారణకు విత్తిన 1-2 రోజుల్లో అట్రాజిన్ 50% పొడి మందును ఎకరాకు 800-1200 గ్రాములు 200 లీటర్ల నీటిలో కలిపి పిచికారి చేయాలి. అంతర పంటలు వేయాలనుకుంటే పెండమితలిన్ 30% EC 1 లీటరు 200 లీటర్ల నీటిలో కలిపి పిచికారి చేయడం మంచిది. 20-25 రోజుల తర్వాత గడ్డి జాతి కలుపు మొక్కలు ఉంటే టెంపో ట్రయాన్ 34.4% SC 115 మి.లీ. 200 లీటర్ల నీటిలో కలిపి పిచికారి చేయాలి.

వర్షాలు, ఉష్ణోగ్రత పెరుగుదల వల్ల ఆకు ఎండు తెగుళ్లు (టర్సికం) వచ్చే అవకాశం ఉంది. నివారణకు మ్యాంకోజబ్ 500 గ్రాములు లేదా ప్రోపికోనజోల్ 200 మి.లీ. ఎకరాకు పిచికారి చేయాలి. వ్యాప్తి ఎక్కువైతే ఎజాక్సీ స్ట్రోబెన్ + డైఫెన్కనోజోల్ కాంబినేషన్ మందును ఎకరాకు 200 మి.లీ. పిచికారి చేయాలి. కత్తెర పురుగు నివారణకు లింగాకర్షక బుట్టలు పెట్టడం, 5% వేపగింజల కషాయం పిచికారి చేయడం, అవసరాన్ని బట్టి ఎమామెటిక్న్ బెంజోయేట్ 80 గ్రాములు లేదా క్లోరంటనిప్రోల్ 60 మి.లీ. లేదా స్పైనోతెరామ్ 100 మి.లీ. ఎకరాకు మారుస్తూ పిచికారి చేయాలి. సుడులు పూర్తిగా తడిచేలా పిచికారి చేయడం ముఖ్యం.