POK లో భారీ సంక్షోభం: పాకిస్తాన్‌కు మరో దెబ్బ

పాకిస్తాన్ ఆక్రమిత కాశ్మీర్ (POK) లో ప్రజల ఆందోళనలు మరింత తీవ్రతరమయ్యాయి. నియంత్రణ రేఖ సమీపంలో వేలాది మంది ప్రజలు పాకిస్తాన్‌కు వ్యతిరేకంగా నినాదాలు చేస్తున్నారు. తాము పాకిస్తాన్‌లో భాగం కాదని, స్వయం ప్రతిపత్తి కావాలని వారు డిమాండ్ చేస్తున్నారు.

పాక్ పోలీసుల కాల్పుల్లో 24 మంది నిరసనకారులు మృతి చెందారు. 260 మంది గాయపడ్డారు. ఆందోళనలు అణచివేసేందుకు పాక్ ఇంటర్నెట్ నిలిపివేసింది. నిత్యావసర సరుకులు, గోధుమ పిండి సరఫరాపై ఆంక్షలు విధించింది. కీలక రహదారులు మూసివేసింది.

జాయింట్ యాక్షన్ అవామి కమిటీ (JAAC) నాయకత్వంలో స్థానిక హక్కుల పోరాటం కొనసాగుతోంది. జూలై 27న POK అసెంబ్లీకి ఎన్నికలు జరగాల్సి ఉంది. అయితే పాకిస్తాన్‌లో స్థిరపడిన వారి ఓట్లతో స్థానిక ప్రజా ప్రతినిధులను ఎన్నుకోవడం పట్ల అక్కడి ప్రజలు తీవ్రంగా నిరసన తెలుపుతున్నారు.

రవాల్కోట్ కేంద్రంగా ఈ ఆందోళనలు సాగుతున్నాయి. రవాల్కోట్ భారత సరిహద్దుకు కేవలం 10 నుండి 15 కిలోమీటర్ల దూరంలో ఉంది. POK లో పనిచేసిన మాజీ ఆర్మీ అధికారులు కూడా రాజీనామా చేసి ఈ ఉద్యమంలో చేరుతున్నారు.

బలూచిస్తాన్‌లో కూడా అశాంతి తీవ్రంగా ఉంది. TTP దాడులు, ఆఫ్ఘనిస్తాన్‌తో సంఘర్షణ వంటి సమస్యలతో పాకిస్తాన్ చుట్టూ సంకటం ముసురుకుంటోంది. సింధు జలాల ఒప్పందం (IWT) సస్పెండ్ చేసిన నేపథ్యంలో పాకిస్తాన్ అంతర్జాతీయ వేదికపై ఇజ్జత్ కాపాడుకునేందుకు ఇస్లామాబాద్‌లో సదస్సు నిర్వహించింది.

CPEC మార్గం POK గుండా వెళ్ళడంతో చైనా ఈ ప్రాంతంలో తన ప్రయోజనాలను కాపాడుకోవడానికి ప్రయత్నిస్తోంది. POK భారత్‌లో విలీనమైతే పాకిస్తాన్‌తో చైనా సంబంధం తెగిపోతుందని నిపుణులు చెప్తున్నారు. 1971లో బంగ్లాదేశ్ ఏర్పాటులో భారత్ వహించిన పాత్ర మాదిరిగా ఇప్పుడు POK విషయంలో కూడా అవకాశాలు పెరుగుతున్నాయని విశ్లేషకులు అంటున్నారు.