అతిగా యాంటీబయోటిక్స్ వాడకం ఆరోగ్యానికి హానికరం: వైద్య నిపుణుల హెచ్చరిక

వైద్య నిపుణులు యాంటీబయోటిక్స్ అతి వినియోగం ప్రమాదకరమని హెచ్చరిస్తున్నారు. చిన్నపాటి జలుబు, దగ్గు వంటి రోగాలకు కూడా ఎక్కువగా యాంటీబయోటిక్స్ వాడుతున్నారు. ఇది శరీరంలో రెసిస్టెన్స్ పెంచుతుందని, భవిష్యత్తులో ఇన్ఫెక్షన్లు సాధారణ మందులతో నియంత్రించడం కష్టమవుతుందని వారు చెబుతున్నారు.

పిల్లలకు రాసే ప్రిస్క్రిప్షన్లలో 76% యాంటీబయోటిక్స్ ఉంటున్నాయని అధ్యయనాలు తెలుపుతున్నాయి. పెద్దల్లో 80% మందిలో ఇప్పటికే రెసిస్టెన్స్ ఏర్పడింది. స్వయంగా మెడికల్ షాపుల నుంచి కొనుక్కుని మందులు వాడేయడం ఈ సమస్యను మరింత తీవ్రతరం చేస్తోందని నిపుణులు వివరిస్తున్నారు.

యాంటీబయోటిక్స్ కేవలం బ్యాక్టీరియా ఇన్ఫెక్షన్లకు మాత్రమే పనిచేస్తాయి. వైరల్ లేదా ఫంగల్ ఇన్ఫెక్షన్లకు వాడటం సరికాదు. అనవసరమైన వాడకం వల్ల యాంటీమైక్రోబియల్ రెసిస్టెన్స్ (AMR) పెరిగిపోతుంది. దీనివల్ల క్రిటికల్ కేర్లో మందులు పని చేయకపోయే ప్రమాదం ఉందని వైద్యులు స్పష్టం చేస్తున్నారు.

కేంద్ర ప్రభుత్వం, ఎన్ఎంసి, రాష్ట్ర ప్రభుత్వాలు జారీ చేసిన మార్గదర్శకాల ప్రకారం అవసరమైనప్పుడు మాత్రమే యాంటీబయోటిక్స్ ప్రిస్క్రైబ్ చేయాలి. రోగులు డాక్టర్ సూచించిన మోతాదు మొత్తం పూర్తి చేయాలి. మధ్యలో మానేసినా రెసిస్టెన్స్ వచ్చే అవకాశం ఉంది. లక్షణాలు 48 నుంచి 72 గంటల్లో తగ్గకపోతే మళ్లీ డాక్టర్ను సంప్రదించాలని సూచిస్తున్నారు.

తల్లిదండ్రులు పిల్లలకు యాంటీబయోటిక్స్ రాయించాలని డాక్టర్లపై ఒత్తిడి తేవద్దని నిపుణులు చెబుతున్నారు. రిజర్వ్ డ్రగ్స్ అనేవి ఐసియూలో క్రిటికల్ పరిస్థితుల్లో మాత్రమే వాడాలి. సాధారణ స్థాయిలో, మారుమూల ప్రాంతాల్లోను వాడటం వల్ల భవిష్యత్తులో అవి పనిచేయకుండా పోయే ప్రమాదం ఉంది.

ప్రజలు జ్వరం, జలుబు వంటి సమస్యలకు నేరుగా మందులు వాడకుండా, అర్హతగల వైద్యుడిని సంప్రదించాలని వైద్య నిపుణులు సలహా ఇస్తున్నారు. ప్రాణాపాయ స్థితిలో మందులు పని చేయకపోయే పరిస్థితిని నివారించడానికి ఈ జాగ్రత్తలు తప్పనిసరి అని వారు నొక్కి చెప్పారు.