హైదరాబాద్‌లో స్వదేశీ HTO ఇంప్లాంటుతో మెడికవర్‌లో విజయవంతమైన మోకాలి శస్త్రచికిత్స

హైదరాబాద్: ఫైనాన్షియల్ డిస్ట్రిక్ట్ లోని మెడికవర్ ఆస్పత్రిలో వైద్యులు ఒక విజయవంతమైన ఆర్థోపెడిక్ శస్త్రచికిత్స చేశారు. 28 ఏళ్ల యువకుడికి మోకాలి ఎముక లోపంతో బాధపడుతున్న పరిస్థితిలో హై టిబియల్ ఆస్టియోటమీ (HTO) సర్జరీ చేశారు.

సీనియర్ జాయింట్ ప్రిజర్వేషన్ స్పెషలిస్ట్ డాక్టర్ రఘువీర్ రెడ్డి నేతృత్వంలో ఈ సర్జరీ జరిగింది. ఎముకల అలైన్మెంట్ సరిచేసే HTO సర్జరీతో పాటు కార్టిలేజ్ పునరుద్ధరణ కోసం ఆటోలాగస్ కాండ్రోసైట్ ఇంప్లాంటేషన్ (ACI) విధానాన్ని కూడా అనుసరించారు. పేషెంట్ వేగంగా కోలుకుంటున్నాడని ఆస్పత్రి వర్గాలు తెలిపాయి.

ఈ సర్జరీకి సిరోనిక్స్ సంస్థ రూపొందించిన HTO ఇంప్లాంట్ ఉపయోగించారు. ఇది పూర్తిగా భారతదేశంలోనే తయారైన ఇంప్లాంట్. మేకిన్ ఇండియా కార్యక్రమానికి ఇది ఒక మంచి ఉదాహరణగా చెప్పారు.

డాక్టర్ రఘువీర్ రెడ్డి మాట్లాడుతూ, మోకాలి నొప్పి ఉన్న ప్రతి ఒక్కరికీ నీ రీప్లేస్మెంట్ అవసరం లేదని, ప్రారంభ దశలో HTO వంటి జాయింట్ ప్రిజర్వేషన్ సర్జరీల ద్వారా సహజ మోకాలిని 20 ఏళ్ల వరకు కాపాడుకోవచ్చని తెలిపారు. 55 ఏళ్ల లోపు వారిలో ఇది ఎంతో ఉపయుక్తమని ఆయన అన్నారు.