మేడిగడ్డ బ్యారేజీ: నిర్మాణం పూర్తయిన ఆరు నెలలకే నష్టం — సాటిలైట్ చిత్రాల్లో వెల్లడి

మేడిగడ్డ బ్యారేజీ నిర్మాణం పూర్తయిన ఆరు నెలలకే రక్షణ కాంక్రీట్ బ్లాకులు చెల్లాచెదురు అయినట్లు సాటిలైట్ చిత్రాలు వెల్లడించాయి. 2020 ఫిబ్రవరి 13 నాటి చిత్రాల్లో బ్యారేజీ డౌన్‌స్ట్రీమ్ వైపు ఉన్న బ్లాక్ ప్రొటెక్షన్ బ్లాకులు స్థానభ్రంశం చెంది కనిపించాయి.

జలవనరుల నిపుణుడు భరత్ ఈ విశ్లేషణను వెల్లడించారు. ఆయన ప్రకారం, బ్యారేజీలో ఎనర్జీ డిసిపేటర్లు సరిపడా రూపొందించలేదు. దీంతో వరద నీటి ప్రవాహ వేగం తగ్గకపోవడం వల్ల హై-ఎనర్జీ ఫ్లో బ్లాకులను తాకి వాటిని కొట్టుకుపోయేలా చేసింది. ఉపరితల ప్రవాహం సబ్క్రిటికల్ ఫ్లోగా మార్చడంలో విఫలమైందని ఆయన వివరించారు.

2020 డిసెంబరు 8న తీసిన మరో చిత్రంలో బ్యారేజీలోని బ్లాక్-7 ప్రాంతంలో ఇసుక మేటలు ఏర్పడటంతోపాటు, పైపింగ్ (నేలకోత) సంకేతాలు కనిపించాయి. దీని వల్ల ఫౌండేషన్ మట్టి బయటకు వచ్చి నిర్మాణం మరింత బలహీనపడింది. తొలుత సర్ఫేస్ ఫ్లోతో బ్లాకులు కొట్టుకుపోయి, ఆ తర్వాత సీపేజ్ ఫోర్స్ వల్ల పైపింగ్ జరిగి ఉండొచ్చని భరత్ అభిప్రాయపడ్డారు.

గేట్ల ఆపరేషన్ కోసం మాన్యువల్ సైట్‌కు అందించిన దాఖలాలు లేవని, డిజైన్ లోపాలే ప్రధాన కారణమని ఆయన సూచించారు. ఈ విషయంపై నీటిపారుదల శాఖ అధికారుల స్పందన తెలియాల్సి ఉంది.