18 ఏళ్లు విమానాశ్రయంలోనే జీవితం: మెహరాన్ కరిమి నాసేరి కథ

ఇరాన్ దేశస్థుడు మెహరాన్ కరిమి నాసేరి 1988 నుంచి 2006 వరకు 18 సంవత్సరాల పాటు పారిస్‌లోని చార్లస్ డిగాలే విమానాశ్రయంలోనే నివసించారు.

1988లో ఆయన ఐరోపాలో శరణార్థిగా ఉంటూ బ్రిటన్ వెళ్తుండగా, పారిస్ విమానాశ్రయంలో అతని ప్రయాణ పత్రాలు చోరీకి గురయ్యాయి. పాస్‌పోర్ట్, శరణార్థి పత్రాలు లేకపోవడంతో బ్రిటన్ ఇమ్మిగ్రేషన్ అధికారులు ఆయనను తిరిగి పారిస్‌కు పంపించారు. ఫ్రాన్స్ అధికారులు దేశంలోకి ప్రవేశించడానికి అనుమతించలేదు. వేరే దేశానికి పంపించడానికి ఎలాంటి ధ్రువీకరణ పత్రాలు లేవు. ఫలితంగా టర్మినల్ 1 డిపార్చర్ లాంజ్‌లోనే ఉండిపోయారు.

అక్కడ ఎర్రటి ప్లాస్టిక్ బెంచ్ మీద నివాసం ఏర్పాటు చేసుకున్నారు. విమానాశ్రయ సిబ్బంది, ప్రయాణికులు ఇచ్చే ఆహారంతో కాలం వెళ్లదీశారు. ప్రతిరోజు పేపర్లు చదవడం, ఆర్థిక శాస్త్ర పుస్తకాలు అధ్యయనం చేయడం, డైరీలో అనుభవాలు రాసుకోవడం ఆయన దినచర్యగా మారింది. స్టీవెన్ స్పీల్బర్గ్ దర్శకత్వం వహించిన ‘ది టర్మినల్’ సినిమాకు ఆయన నిజజీవితమే స్ఫూర్తి. సినిమా హక్కుల కోసం స్పీల్బర్గ్ ఆయనకు సుమారు 2,50,000 డాలర్లు చెల్లించారు.

2006లో అనారోగ్య కారణాల వల్ల ఆసుపత్రికి తరలించడంతో అతని 18 ఏళ్ల విమానాశ్రయ నివాసం ముగిసింది. తర్వాత పారిస్‌లోని స్వచ్ఛంద ఆశ్రయాల్లో ఉన్నారు. 2022లో మళ్లీ చార్లస్ డిగాలే విమానాశ్రయానికి వచ్చారు. అక్కడే కొన్ని వారాల తర్వాత గుండెపోటుతో మరణించారు. ప్రయాణ పత్రాల చట్టాలు, అధికారిక లోపాలు ఒక వ్యక్తి జీవితాన్ని ఎలా నిర్బంధించగలదో ఈ కథ చూపిస్తుంది.