ఒలేష్కీలో కాల్పుల విరమణకు తానే మధ్యవర్తి అని మెలానియా ట్రంప్ వెల్లడి

ఒలేష్కీ ప్రాంతంలో కాల్పుల విరమణ కోసం రష్యా, ఉక్రెయిన్ మధ్య తానే ప్రత్యేక మధ్యవర్తిగా వ్యవహరించినట్లు మెలానియా ట్రంప్ తెలిపారు. ఈ ప్రాంతంలో మానవతా సంక్షోభ తీవ్రతను సెప్టెంబర్‌లోనే గుర్తించానని, వెంటనే తన ప్రతినిధి మార్క్ బెక్‌మన్‌ను రష్యా, ఉక్రెయిన్‌లతో చర్చలు జరిపేందుకు నియమించానని ఆమె చెప్పారు.

గతంలో ఈ ప్రాంతంలో కాల్పుల విరమణకు చేసిన ప్రయత్నాలు విఫలమయ్యాయని రెండు దేశాలు అంగీకరించాయని, తన భాగస్వామ్యాన్ని అవి స్వాగతించాయని మెలానియా ట్రంప్ పేర్కొన్నారు. ప్రత్యేక మధ్యవర్తిగా తనతో కలిసి పనిచేసేందుకు రష్యా, ఉక్రెయిన్ అంగీకరించాయని, ఈ ఏర్పాటును రాతపూర్వక ఒప్పందాల రూపంలో రెండు దేశాలు రూపొందించి సంతకాలు చేసినట్లు ఆమె వివరించారు.

ఈ చర్చల లక్ష్యం రెండింటేనని ఆమె తెలిపారు. ఒలేష్కీ నివాసులకు అత్యవసర మానవతా సహాయం అందించడం, పౌరులను సురక్షితంగా తరలించే మార్గాన్ని ఏర్పాటు చేయడం. ఇంతకుముందు రష్యా, ఉక్రెయిన్‌లలో పిల్లలను వారి కుటుంబాలతో కలిపే కార్యక్రమం కోసం ఏర్పాటు చేసుకున్న సంప్రదింపు మార్గాలనే ఈ ఆపరేషన్ కోసం ఉపయోగించినట్లు ఆమె చెప్పారు.

ఒలేష్కీ ఉక్రెయిన్‌లోని ఖెర్సన్ ప్రాంతంలో డ్నీపర్ నది ఒడ్డున ఉన్న పట్టణం. యుద్ధం ప్రారంభమైన తర్వాత ఈ ప్రాంతం తీవ్రంగా ప్రభావితమైంది. ఈ ఆపరేషన్‌లోని ప్రతి అంశాన్ని రష్యా, ఉక్రెయిన్‌ల మానవతా, సైనిక, ప్రభుత్వ అధికారులు సమన్వయం చేస్తున్నట్లు మెలానియా ట్రంప్ తెలిపారు.