1000 కి.మీ రేంజ్, ఫాస్ట్ ఛార్జింగ్: MG కొత్త ADAPT ప్లాట్ఫామ్ లాంచ్

MG మోటార్స్ ఇండియా కొత్త ADAPT (అడ్వాన్స్డ్ డ్రైవ్ ఆర్కిటెక్చర్ ప్లాట్ఫామ్) టెక్నాలజీని లాంచ్ చేసింది.

ఒకే ప్లాట్ఫామ్‌పై ఎలక్ట్రిక్, హైబ్రిడ్, ప్లగ్గిన్ హైబ్రిడ్, రేంజ్ ఎక్స్టెండర్ ఎలక్ట్రిక్ కార్లను తయారు చేసేలా ఈ కొత్త ప్లాట్ఫామ్ రూపొందించారు. ఇప్పుడు ప్రతి రకం కారుకు ప్రత్యేక ప్లాట్ఫామ్ అవసరం కావడంతో కంపెనీలకు ఖర్చు ఎక్కువైంది. ADAPT వల్ల ఆ ఖర్చులు గణనీయంగా తగ్గనున్నాయి.

ఈ ప్లాట్ఫామ్‌పై వచ్చే ప్లగ్గిన్ హైబ్రిడ్, రేంజ్ ఎక్స్టెండర్ మోడల్స్‌లో బ్యాటరీతో పాటు పెట్రోల్ ఇంజిన్ కూడా ఉంటుంది. కారును పూర్తిగా ఛార్జ్ చేసి, పూర్తి ట్యాంక్ పెట్రోల్ నింపితే ఒకేసారి 1000 కిలోమీటర్ల వరకు రేంజ్ ఇస్తామని కంపెనీ చెబుతోంది. అయితే, కారులో ఉపయోగించే పవర్ ట్రైన్ బట్టి ఈ రేంజ్ మారవచ్చు.

ADAPT ప్లాట్ఫామ్ 400 వోల్ట్, 800 వోల్ట్ ఎలక్ట్రికల్ ఆర్కిటెక్చర్లకు మద్దతు ఇస్తుంది. దీని వల్ల చాలా వేగంగా బ్యాటరీ ఛార్జింగ్ అవుతుంది.

ఈ కొత్త టెక్నాలజీతో తొలి కారు ప్రస్తుత ఆర్థిక సంవత్సరంలోనే మార్కెట్‌లోకి రానుందని MG వెల్లడించింది. ఒక ఎలక్ట్రిక్ కారు, ఒక ప్లగ్గిన్ హైబ్రిడ్ కారును లాంచ్ చేయనున్నట్లు కంపెనీ తెలిపింది.