MHSRB మల్టీ పర్పస్ హెల్త్ అసిస్టెంట్ మహిళా పోస్టుల తొలి ప్రొవిజనల్ మెరిట్ జాబితా విడుదల

మల్టీ పర్పస్ హెల్త్ అసిస్టెంట్ (ఫీమేల్) పోస్టుల నియామకానికి సంబంధించి మెడికల్ అండ్ హెల్త్ సర్వీసెస్ రిక్రూట్మెంట్ బోర్డు (MHSRB) తొలి ప్రొవిజనల్ మెరిట్ జాబితాను విడుదల చేసింది.

మే 14న జరిగిన రాత పరీక్షలో అభ్యర్థులు సాధించిన మార్కులతో పాటు కాంట్రాక్ట్, అవుట్‌సోర్సింగ్ సర్వీసుల అనుభవానికి వెయిటేజీ మార్కులు కలిపి మొదటి జాబితాను రూపొందించారు. గతంలో మే 18 నుంచి 22 వరకు అభ్యంతరాలు స్వీకరించగా, వాటిని పరిష్కరించిన అనంతరం ఇప్పుడు 1,931 మంది అభ్యర్థుల పేర్లతో తొలి ప్రొవిజనల్ మెరిట్ జాబితాను బోర్డు ఇవాళ ప్రకటించింది.

నియామక ప్రక్రియలో మరింత పారదర్శకత కోసం మరోసారి అభ్యంతరాలు స్వీకరించాలని MHSRB నిర్ణయించింది. జూలై 13 నుంచి 15వ తేదీ సాయంత్రం 5 గంటల వరకు ఈ ప్రొవిజనల్ మెరిట్ జాబితాపై అభ్యంతరాలు తెలియజేయవచ్చని బోర్డు తెలిపింది.

అదే సమయంలో ల్యాబ్ టెక్నీషియన్ గ్రేడ్‌-2 స్పోర్ట్స్ కోటా ఉద్యోగాల సెలక్షన్ జాబితాను కూడా బోర్డు విడుదల చేసింది. మొత్తం 18 స్పోర్ట్స్ కోటా పోస్టులకు అర్హతలు ఉన్న 11 మందిని ఎంపిక చేసినట్లు ప్రకటించింది. ఈ రెండు జాబితాలు MHSRB అధికారిక వెబ్‌సైట్‌లో అందుబాటులో ఉన్నాయి.