సిద్దిపేట జిల్లాలో మంత్రులు వివేక్, పొన్నం ఆయిల్ పామ్ సాగు ప్రారంభం

మంత్రులు వివేక్ వెంకటస్వామి, పొన్నం ప్రభాకర్ సిద్దిపేట జిల్లా అక్కన్నపేట మండలం జనగామ గ్రామంలో రైతులతో కలిసి ఆయిల్ పామ్ మొక్కలు నాటారు.

ఈ సందర్భంగా మంత్రి వివేక్ వెంకటస్వామి మాట్లాడుతూ, ఎల్‌నినో ప్రభావంతో నీటి ఆధారిత పంటలు సాగు చేయడం కష్టమని, రైతులు ఆయిల్ పామ్ వైపు మళ్లాలని సూచించారు. ఆయిల్ పామ్ సాగు చేసే రైతులకు ప్రభుత్వం నాలుగేళ్ల పాటు సబ్సిడీ ఇస్తుందని, రైతు భరోసా కూడా వర్తిస్తుందని తెలిపారు.

ఆయిల్ పామ్ సాగు చేసే గ్రామాలకు ప్రోత్సాహకాలు అందించనున్నట్లు ఇద్దరు మంత్రులు ప్రకటించారు. గ్రామంలో 100 ఎకరాల్లో ఆయిల్ పామ్ పెట్టుకుంటే, మంత్రి పొన్నం ప్రభాకర్ రూ.5 లక్షలు, మంత్రి వివేక్ మరో రూ.5 లక్షలు గ్రామ పంచాయతీ అభివృద్ధికి అందిస్తామని హామీ ఇచ్చారు. 100 నుంచి 200 ఎకరాలకు అదనంగా నిధులు ఇస్తామని, 200 ఎకరాలకు పైగా చేస్తే 10 లక్షల వరకూ ప్రోత్సాహకం ఇవ్వనున్నట్లు వారు తెలిపారు.

గత మూడేళ్లుగా తెలంగాణలో పంట దిగుబడి ఎక్కువగా ఉండడంతో గోదాములు నిండిపోయాయని, ఎగుమతికి సైతం అవకాశం లేదని మంత్రి వివేక్ అభిప్రాయపడ్డారు. అందువల్ల పంట వైవిధ్యం (క్రాప్ డైవర్సిఫికేషన్) అవసరమని, ఆయిల్ పామ్ ద్వారా శాశ్వత ఆదాయం లభిస్తుందని అన్నారు. దేశంలో నూనె దిగుమతులు తగ్గించాలంటే ఆయిల్ పామ్ ఉత్పత్తి పెంచాల్సిన అవసరం ఉందని చెప్పారు. ఈ ప్రాంతంలో ఆయిల్ పామ్ ఫ్యాక్టరీ ఉండడంతో రైతులకు మార్కెట్ సమీపంలో లభిస్తుందన్నారు.

సర్పంచులు, గ్రామ పెద్దలు రైతులను చైతన్యపరిచి, ప్రతి గ్రామంలో సామూహికంగా ఆయిల్ పామ్ తోటలను పెంచాలని మంత్రులు విజ్ఞప్తి చేశారు.