మొహరం ఊరేగింపుపై విషప్రయోగ కుట్రను భగ్నం చేసిన ముంబై పోలీసులు; పూణే వ్యాపారి అరెస్ట్

ముంబైలో మొహరం ఊరేగింపులో పాల్గొనే వేలాది మందికి విషపూరిత క్యాప్సుల్స్ పంచాలనే కుట్రను పోలీసులు భగ్నం చేశారు. ఈ కేసులో పూణేకు చెందిన వ్యాపారి ఫయాజ్ నిసార్ ప్రేమ్జీని అరెస్ట్ చేశారు.

పెయింట్ వ్యాపారి అయిన ప్రేమ్జీ, ఎలుకలను చంపేందుకు వాడే జింక్ ఫాస్ఫైడ్ విషాన్ని భారీగా సేకరించి, క్యాప్సుల్స్‌లో ఒక్కో గ్రాము చొప్పున నింపాడు. వీటిని మొహరం ఊరేగింపులో పంపిణీ చేసి భారీ ప్రాణనష్టం కలిగించాలని అతడు ప్రణాళిక వేశాడు.

ఒక వ్యక్తి క్యాప్సుల్ తీసుకున్న తర్వాత అస్వస్థతకు గురికావడంతో పోలీసులు అనుమానంతో రంగంలోకి దిగారు. విచారణలో ప్రేమ్జీ 30,000 క్యాప్సుల్స్ తయారు చేయాలనే లక్ష్యంతో 14,900 వరకు సిద్ధం చేసినట్టు తేలింది. పోలీసులు మిగిలిన వాటిని స్వాధీనం చేసుకున్నారు.

ప్రేమ్జీ ఇటీవల ఇరాక్, ఇరాన్ దేశాలకు ప్రయాణించినట్టు గుర్తించిన పోలీసులు, అంతర్జాతీయ ఉగ్రవాద సంస్థలతో లింకుల కోణంలో దర్యాప్తు చేస్తున్నారు. గతంలో గుజరాత్‌లో ఇదే తరహా విష క్యాప్సుల్స్ కేసులో హైదరాబాద్‌కు చెందిన ఒక వైద్యుడు అరెస్ట్ అయిన నేపథ్యంలో ఈ కుట్ర మరింత ప్రాధాన్యత సంతరించుకుంది.