మూసీ నదిలో గుర్రపు డెక్క విస్తరణ: పరిసర ప్రాంతాల్లో వ్యాధుల భయం

తెలంగాణ ప్రభుత్వం మూసీ నదిని అంతర్జాతీయ స్థాయిలో సుందరంగా తీర్చిదిద్దేందుకు వేల కోట్ల రూపాయల ప్రాజెక్టును ప్రకటించింది. కానీ క్షేత్రస్థాయిలో పరిస్థితి భిన్నంగా ఉంది. నది ప్రస్తుతం గుర్రపు డెక్కతో నిండిపోయి దోమల కేంద్రంగా మారింది.

హైదరాబాద్ నడిబొడ్డున 55 కి.మీ. ప్రవహించే మూసీలో 21 కి.మీ. మేర గుర్రపు డెక్క దట్టంగా పేరుకుపోయింది. దీన్ని తొలగించేందుకు GHMC ప్రతి ఏడాది 3 నుంచి 5 కోట్ల రూపాయలు ఖర్చు చేస్తున్నా మొక్కలు తగ్గకుండా మరింత విస్తరిస్తున్నాయి. నదిలో వ్యర్థాలు నిలువరించే జాలీలు ధ్వంసం కావడంతో మురుగు, ప్లాస్టిక్ బాటిళ్లు, జంతు వ్యర్థాలు పేరుకుపోయి దుర్వాసన వ్యాపిస్తోంది.

అత్తాపూర్, లంగర్ హౌస్, జియాగూడా, నాగోల్ వంటి పరివాహక ప్రాంతాల్లో డెంగీ, మలేరియా, టైఫాయిడ్ కేసులు పెరుగుతున్నాయని స్థానికులు ఆవేదన వ్యక్తం చేస్తున్నారు. దోమల నివారణకు 15 నుంచి 20 కోట్లు కేటాయిస్తున్నా ఫలితం లేదని, అధికారులు బాధ్యతగా వ్యవహరించడం లేదని విమర్శిస్తున్నారు.

మూసీ ఒడ్డున గేటెడ్ కమ్యూనిటీల్లో నివాసం ఉంటున్న పలువురు ఇళ్లు కొనేటప్పుడు నది శుభ్రం చేస్తామనే హామీ ఇచ్చిన మాటలు నమ్మి ఇక్కడికి వచ్చామని, కానీ గత ఏడాదిన్నరలో పరిస్థితి మరింత దిగజారిందని చెబుతున్నారు. ఒక నివాసి మాట్లాడుతూ, "మేము ఫ్లాట్ కొని ఐదేళ్లయింది. క్లీన్ చేస్తామన్నారు. కానీ చివరి ఏడాదిన్నర నుంచి దోమలు, దుర్వాసన ఎక్కువైంది. ఇక్కడ ఉండాలా లేదా అని ఆలోచిస్తున్నాం" అని తెలిపారు.

గతంలో GHMC ఎంటమాలజీ విభాగం నదిపై నిఘా ఉంచి కెమికల్ పిచికారి చేసేదని, కానీ ఇప్పుడు ఆ పనులు జరగడం లేదని స్థానికులు ఆరోపిస్తున్నారు. MRDCL, GHMC అధికారులు ఒకరిపై ఒకరు నిందారోపణ చేసుకుంటూ బాధ్యత తప్పించుకుంటున్నారన్న విమర్శలు ఉన్నాయి. స్థానికులు నదిని శుభ్రం చేయాలని, దోమల నివారణకు వెంటనే చర్యలు తీసుకోవాలని కోరుతున్నారు. అధికారులు స్పందించి గుర్రపు డెక్కను తొలగిస్తారా అనేది చూడాలి.