మైథాలజీ సినిమాల్లో మోషన్ క్యాప్చర్ ట్రెండ్; భారీ ప్రాజెక్ట్స్ ప్రకటన

భారతీయ సినిమాల్లో మైథాలజీ (పౌరాణిక) కథలకు గిరాకీ పెరుగుతోంది. ముఖ్యంగా యానిమేషన్, మోషన్ క్యాప్చర్ టెక్నాలజీతో మన ఇతిహాసాలను వెండితెరపైకి తీసుకురావడం ఇటీవలి ట్రెండ్‌గా మారింది. ఇప్పటికే వారణాసి, రామాయణ, జై హనుమాన్ వంటి ప్రాజెక్ట్స్‌తో పాటు ఎన్టీఆర్-త్రివిక్రమ్ కాంబోలో ‘గాడ్ ఆఫ్ వార్స్’ కూడా ప్రకటించారు. ఇప్పుడు మరింత ముందుకెళ్లి మోషన్ క్యాప్చర్ యానిమేషన్‌తో కొత్త చిత్రాలు రానున్నాయి.

గతేడాది విడుదలైన ‘మహావతార నరసింహ’ యానిమేటెడ్ సినిమా బాక్సాఫీస్ వద్ద రూ.400 కోట్లు వసూలు చేసిందని సంబంధిత వర్గాలు తెలిపాయి. ఆ విజయం తర్వాత ఇప్పుడు అదే ఫ్రాంచైజీలో ‘మహావతార పరశురామ’ రూపొందనుంది. కార్తికేయ 2లో శ్రీకృష్ణుడి కంకణం ఎపిసోడ్ తీసిన దర్శకుడు చందు ముండేటి హనుమంతుడి కథతో ‘వాయుపుత్ర’ అనే మోషన్ క్యాప్చర్ సినిమాను సితారా ఎంటర్టైన్మెంట్స్‌తో కలిసి నిర్మించనున్నారు. ఈ ప్రాజెక్ట్‌పై ప్రస్తుతం సస్పెన్స్ నెలకొనగా, త్వరలో మరిన్ని వివరాలు రావచ్చు.

హనుమంతుడిపై ఇప్పటికే ప్రశాంత్ వర్మ ‘జై హనుమాన్’ సినిమాను రూపొందిస్తుండగా, మరో హనుమత్ సినిమా ‘హనుమత్ సుందరకాండ’ కూడా తెరకెక్కనుంది. 3D యానిమేషన్, కటింగ్ ఎడ్జ్ టెక్నాలజీతో అరుణ్ కుమార్ రాపోలు దర్శకత్వంలో ఈ చిత్రంలో రామాయణంలోని ముఖ్య ఘట్టాలు చూపించనున్నారు. మొత్తంగా మైథాలజీతో మోషన్ క్యాప్చర్ కలయికతో టాలీవుడ్‌లో కొత్త ట్రెండ్ కనిపిస్తోంది.