నాగార్జున సాగర్ నీటిమట్టం డెడ్ స్టోరేజీకి చేరువ, హైదరాబాద్ తాగునీటికి ముప్పు

నాగార్జున సాగర్ జలాశయంలో నీటిమట్టం ప్రమాదకరంగా డెడ్ స్టోరేజీ స్థాయికి చేరువలో ఉంది. ప్రస్తుతం నీటిమట్టం 513.70 అడుగుల వద్దకు పడిపోయింది.

ఎగువ ప్రాంతాల నుంచి ఇన్‌ఫ్లో పూర్తిగా నిలిచిపోవడంతో నీటి నిల్వలు క్షీణిస్తున్నాయి. వర్షాభావ పరిస్థితులు ఇలానే కొనసాగితే, రానున్న రోజుల్లో హైదరాబాద్‌కు తాగునీటి సరఫరాకు తీవ్ర ఆటంకాలు ఏర్పడే ప్రమాదం ఉంది.

డెడ్ స్టోరేజీ కంటే దిగువకు నీటిమట్టం పడిపోతే గ్రావిటీ ద్వారా హైదరాబాద్‌కు నీటిని సరఫరా చేయడం అసాధ్యం. దీనిని దృష్టిలో ఉంచుకొని, హైదరాబాద్ మెట్రో వాటర్ బోర్డ్ అధికారులు నాగార్జున సాగర్ పుట్టంగండి వద్ద ఎమర్జెన్సీ మోటార్లు ఏర్పాటు చేసుకున్నారు. ఈ మోటార్ల ద్వారా నీటిని లిఫ్ట్ చేసి AMRP కి పంపింగ్ చేయనున్నారు.

గత ఏడాది ఇదే సమయంలో నాగార్జున సాగర్ నిండుగా ఉన్నది. కానీ ఈ ఏడాది ఎల్నినో ప్రభావంతో భూగర్భ జలాలు కూడా తగ్గిపోతున్నాయి. వర్షాలు కురిసి ఎగువ నుంచి ప్రవాహాలు మొదలైతే తప్ప ఈ సమస్యకు తక్షణ పరిష్కారం లభించదని అధికారులు అభిప్రాయపడుతున్నారు. ప్రస్తుతం మాత్రం ఎటువంటి నీటి కోతలు ప్రకటించలేదు.