నాగుల చవితి 2026: పుట్టకు పాలు పోసి, ఇంటి ద్వారానికి సర్పాల చిత్రాలు వేసే సంప్రదాయం

నాగుల చవితి 2026 సందర్భంగా ఇంటి ప్రధాన ద్వారానికి ఇరువైపులా సర్ప కుటుంబ చిత్రాలను వేస్తారు. ఈ ఆచారం కార్తీక మాసంలో వచ్చే నాగుల చవితి రోజున పాటిస్తారు.

ఈ రోజున మహిళలు ఉపవాసం ఉండి, తలస్నానం చేసి పట్టు చీర ధరిస్తారు. పాలు, చలిమిడి, అరటిపండు, జామపండు వంటి పళ్లను తీసుకుని సమీపంలోని పుట్ట వద్దకు వెళ్తారు.

పుట్ట వద్ద పళ్లు ఉంచి పాలు పోస్తారు. అక్కడి నుంచి కొంత పుట్ట మట్టిని ఇంటికి తీసుకువస్తారు. ఇంటికి వచ్చాక ప్రధాన ద్వారానికి ఇరువైపులా సర్ప కుటుంబ చిత్రాలు వేసి 'నాగయ్య రక్ష' అని ప్రార్థిస్తారు.

పూజ గదిలో పుట్ట మట్టితో చిన్న పుట్టను ఏర్పాటు చేసి పేలాలు, చలిమిడి, పళ్లు, పాలు నివేదన చేస్తారు. పసుపు రాసిన, ముడులు లేని ఐదు దారాల తోరాన్ని ఆ పుట్టపై ఉంచుతారు. ఇంట్లో ఉన్న పిల్లల సంఖ్యకు తగినన్ని తోరాలు వేర్వేరుగా ఉంచుతారు. ఈ తోరాలు పిల్లల రక్షణ సంకేతంగా భావిస్తారు.