బందర్ లో బలిజ నేతల ప్రలోభ ఆరోపణలను ఖండించిన ఎమ్మెల్యే నాయకర్

టీడీపీ విప్, నరసాపురం ఎమ్మెల్యే బొమ్మిడి నారాయణ నాయకర్ తనపై వైఎస్ఆర్సీపీ నేత పేర్ని నాని చేసిన ఆరోపణలను ఖండించారు. ఓ యూట్యూబర్ అరెస్టుకు సంబంధించి రాజకీయ వివాదం చెలరేగింది. ఈ నేపథ్యంలో పేర్ని నాని విలేకరుల సమావేశంలో మాట్లాడుతూ, నాయకర్, ఎమ్మెల్సీ హరిప్రసాద్ బందర్ వెళ్లి బలిజ సామాజిక నేతలను ప్రలోభాలకు గురి చేశారని ఆరోపించారు.

అయితే నాయకర్ ఈ ఆరోపణలను తోసిపుచ్చారు. తాను నెల్లూరు పార్లమెంట్ నియోజకవర్గం పార్టీ అబ్జర్వర్‌గా కార్యకర్తల నుంచి దరఖాస్తులు స్వీకరిస్తున్నానని, అక్కడే ఉన్నానని స్పష్టం చేశారు. బందర్‌లో తాను లేనని, అక్కడ జరిగిన పార్టీ కార్యక్రమంలో హరిప్రసాద్ మాత్రమే ఉన్నారని వివరించారు. పేర్ని నాని అబద్ధ ప్రచారం చేస్తున్నారని ఆరోపించారు.

అలాగే, వైఎస్ఆర్సీపీ ప్రభుత్వ హయాంలో నరసాపురం ఫిషింగ్ హార్బర్ నిర్మాణం సక్రమంగా జరగలేదని, జగన్ శంకుస్థాపన చేసినా పనులు ముందుకు సాగలేదని నాయకర్ విమర్శించారు. రాష్ట్రంలో మత్స్యకారులకు డీజిల్ సబ్సిడీ, బోట్ల సబ్సిడీ వంటి ప్రయోజనాలను కూటమి ప్రభుత్వం అందిస్తోందని చెప్పారు. యూట్యూబర్ రావణ అరెస్ట్ పై వైఎస్ఆర్సీపీ శ్రేణులు ఆందోళన వ్యక్తం చేస్తున్నాయి.