నర్సీపట్నం మున్సిపల్ ఎన్నికల్లో ఉదయం 11 గంటల వరకు 35 శాతం పోలింగ్

అనకాపల్లి జిల్లా నర్సీపట్నం మున్సిపాలిటీ ఎన్నికల్లో ఉదయం 11 గంటల వరకు 35 శాతానికి పైగా పోలింగ్ నమోదైంది. ఉదయం 7 గంటలకు ప్రారంభమైన పోలింగ్ సాయంత్రం 5 గంటల వరకు కొనసాగుతుంది.

ఈ మున్సిపాలిటీలో మొత్తం 40 వార్డులు ఉన్నాయి. 26, 27 వార్డులు ఏకగ్రీవమయ్యాయి. మిగిలిన 38 వార్డులకు 76 పోలింగ్ కేంద్రాల్లో ఎన్నిక జరుగుతోంది. ఈ ఎన్నికల్లో 91 మంది అభ్యర్థులు పోటీలో ఉన్నారు.

డాన్ బాస్కో స్కూల్ సమీపంలోని పోలింగ్ కేంద్రంలో ఉదయం నుంచే ఓటర్లు బారులు తీరారు. క్యూలో ఎక్కువగా మహిళా ఓటర్లు కనిపిస్తున్నారు. వృద్ధులు, వికలాంగుల కోసం ప్రతి కేంద్రం వద్ద వీల్‌చైర్లు, సహాయక సిబ్బందిని ఏర్పాటు చేశారు. టెంట్లు, తాగునీరు, వైద్యులు, మందుల సౌకర్యం కూడా కల్పించారు.

ప్రధాన పోటీ TDP నేతృత్వంలోని కూటమి, YSRCP అభ్యర్థుల మధ్య ఉంది. TDP తరఫున చింతకాయల పద్మావతి పోటీ చేస్తున్నారు. ఈ మున్సిపాలిటీ 2011లో అప్‌గ్రేడ్ అయింది. 2014లో BC మహిళా రిజర్వేషన్ కింద TDP అభ్యర్థి గెలిచారు.

ఈసారి చైర్‌పర్సన్ ఎన్నిక ప్రత్యక్షంగా జరుగుతోంది. ఓటర్లు వార్డు సభ్యుడికి ఒక ఓటు, చైర్‌పర్సన్‌కు ఒక ఓటు వేస్తున్నారు. గతంలో చైర్‌పర్సన్‌ను వార్డు సభ్యులు ఎన్నుకునేవారు. ఓటర్ స్లిప్, గుర్తింపు కార్డు ఉన్నవారిని మాత్రమే పోలింగ్ కేంద్రంలోకి అనుమతిస్తున్నారు. మూడంచల భద్రత ఏర్పాటు చేశారు. ఇప్పటివరకు ఎలాంటి అవాంఛనీయ ఘటన జరగలేదని అధికారులు తెలిపారు. మధ్యాహ్నం తర్వాత పోలింగ్ శాతం పెరుగుతుందని వారు అంచనా వేస్తున్నారు.