NEET పరీక్షలో బుర్ఖా వివాదం: అజ్మీర్ కేంద్రంలో విద్యార్థినికి ప్రవేశం నిరాకరణ, తర్వాత అనుమతి

అజ్మీర్‌లోని NEET పరీక్షా కేంద్రంలో బుర్ఖా ధరించిన విద్యార్థినికి ప్రవేశం నిరాకరించిన ఘటన తీవ్ర వివాదానికి దారి తీసింది. బేవార్ నుంచి పరీక్షకు హాజరైన కుల్‌సూమ్ బానో అనే విద్యార్థిని, తన దుపట్టా తీసి వేయాలని అధికారులు ముందుగా కోరినట్లు, తర్వాత బుర్ఖా తొలగించాలని ఆదేశించినట్లు ఆరోపించారు. ఎన్టీఏ నిబంధనలు మతపరమైన దుస్తులను అనుమతిస్తాయని, అందువల్ల ప్రవేశం నిరాకరించడం చట్టవిరుద్ధమని ఆమె తండ్రి అన్నారు. మహిళా సిబ్బంది ప్రత్యేక తనిఖీ నిర్వహించి ఉండాల్సిందని, కానీ బుర్ఖా కారణంగా అడ్డుకోవడం మార్గదర్శకాలపై అవగాహన లోపమని కుటుంబం పేర్కొంది.

స్థానిక పోలీసులు స్పందిస్తూ, ఈ సమస్య నియమాలపై స్పష్టత లేక తలెత్తిన గందరగోళమని, సీనియర్ అధికారులు జోక్యం చేసుకొని సమస్య పరిష్కరించినట్లు తెలిపారు. అనంతరం విద్యార్థిని పరీక్ష రాయడానికి అనుమతించామని, కేంద్రంలో మరే వివాదం నమోదు కాలేదని పోలీసులు వెల్లడించారు. ఈ ఘటనతో నీట్‌లో మతపర దుస్తుల విధానంపై మరోసారి చర్చ మొదలైంది. గతంలో కేరళలో హిజాబ్ వివాదం చోటు చేసుకోగా, ఎన్టీఏ మాత్రం మతపరమైన దుస్తులను అనుమతిస్తామని స్పష్టం చేసింది.