మోదీ నాయకత్వంలో 25 కోట్ల మంది పేదరికం నుంచి బయటపడ్డారు : న్యూజిలాండ్ ప్రధాని లక్సన్

న్యూజిలాండ్ ప్రధాని క్రిస్టోఫర్ లక్సన్ భారత ప్రధాని నరేంద్ర మోదీ నాయకత్వాన్ని ఉద్దేశించి ప్రశంసల వర్షం కురిపించారు. న్యూజిలాండ్ పర్యటనలో భాగంగా ఉభయ దేశాల వ్యాపార ప్రతినిధులతో జరిగిన సమావేశంలో ఆయన మాట్లాడారు. మోదీ నాయకత్వంలో భారతదేశం అద్భుతమైన పురోగతి సాధించిందని, 25 కోట్ల మంది ప్రజలు పేదరికం నుంచి బయటపడ్డారని లక్సన్ అన్నారు. ప్రస్తుతం 44 కోట్ల మంది మధ్యతరగతిలో ఉన్నారని, ఈ దశాబ్దం చివరి నాటికి ఆ సంఖ్య 75 కోట్లకు చేరుతుందని ఆయన వివరించారు.

1990ల చివర్లో యూనిలీవర్ సంస్థలో పనిచేస్తున్నప్పుడు తొలిసారి భారత్ వెళ్లిన అనుభవాన్ని లక్సన్ గుర్తు చేసుకున్నారు. అప్పుడు ప్రజలకు రోజువారీ వేతనాలు నాణేల రూపంలో చేతికి వచ్చేవని, ఇప్పుడు ఆర్థిక వ్యవస్థ ఎంతగా మారిపోయిందో చూడటం స్ఫూర్తిదాయకంగా ఉందన్నారు. మోదీ ఇటీవలి కాలంలో 147 విమానాశ్రయాలు నిర్మించారని, దేశీయ పర్యాటకాన్ని నిర్వహించడానికి మరో 2,000 విమానాలు అవసరమవుతాయని ప్రధాని చెప్పిన విషయాన్ని ప్రస్తావించారు. సాంకేతికత, విద్య, వ్యవసాయ ఉత్పత్తుల ఎగుమతి రంగాల్లో సహకారానికి అవకాశాలు ఉన్నాయన్నారు.

ఇప్పటికే భారత్-న్యూజిలాండ్ మధ్య స్వేచ్ఛా వాణిజ్య ఒప్పందం (FTA) కుదిరిందని, అయితే వ్యాపార నేతలే రెండు దేశాల ప్రజల జీవన ప్రమాణాలు పెంచే సంపదను సృష్టించాల్సిన బాధ్యత తీసుకోవాలని లక్సన్ పిలుపునిచ్చారు. న్యూజిలాండ్ వ్యాపారస్తులు విమానమెక్కి భారతీయ వినియోగదారుని అర్థం చేసుకోవాలని, ఉత్పత్తులను స్థానిక అవసరాలకు అనుగుణంగా మార్చుకోవాలని సూచించారు. న్యూజిలాండ్ ఇప్పుడు రాకెట్ ప్రయోగాల్లో ప్రపంచంలో మూడో స్థానంలో ఉందని, సహకారానికి ఎన్నో రంగాలు ఉన్నాయని తెలిపారు.