NH 765డి విస్తరణ పనులు నెమ్మదిగా: ప్రమాదాలు, స్థానికుల ఇబ్బందులు

నిజామాబాద్ జిల్లాలో NH 765డి రహదారి విస్తరణ పనులు నెమ్మదిగా సాగుతున్నాయి. హైదరాబాద్ ఔటర్ రింగ్ రోడ్ నుంచి నిజామాబాద్ రుద్రూరు వరకు 158 కిలోమీటర్ల రహదారి విస్తరణ చేపట్టారు. కామారెడ్డి, నిజామాబాద్ జిల్లాల పరిధిలో 55 కిలోమీటర్ల పనులకు రూ.305 కోట్లు ప్రభుత్వం మంజూరు చేసింది.

పనులు ప్రారంభించి రెండున్నర ఏళ్లు దాటినా విస్తరణ పూర్తి కాలేదు. కొన్ని చోట్ల అటవీ అనుమతులు రాకపోవడంతో పనులు నిలిచిపోయాయి. మరికొన్ని గ్రామాల్లో కేవలం కంకర మాత్రమే పోసి వదిలేశారు. బాన్సవాడ మండలం మొగలాన్పల్లిలో ఇళ్ల సమీపంలో కంకర పోయడంతోపాటు నసరులాబాద్ మండలం నెమ్లి గ్రామం సమీపంలో కల్వర్ట్ల నిర్మాణానికి కూడా కంకర పోసి పనులు నిలిపేశారు.

రహదారి విస్తరణ ఆలస్యం కావడంతో ప్రయాణికులు తీవ్ర ఇబ్బందులు పడుతున్నారు. రోడ్డు పక్కనే గుంతలు తవ్వి ఉంచడం, కాషన్ బోర్డులు లేకపోవడం వల్ల ప్రమాదాలు జరుగుతున్నాయి. ఇప్పటివరకు ఐదుగురు ప్రమాదాల్లో మృతి చెందినట్లు స్థానికులు చెబుతున్నారు. వర్షం పడితే రోడ్డుపై మోకాలి లోతు నీళ్లు నిలిచిపోతున్నాయి. సర్వీస్ రోడ్లపై మురికినీళ్లు పారడంతో రాకపోకలకు ఆటంకం ఏర్పడుతోంది.

కాంట్రాక్టర్ రెండేళ్లలో పూర్తి చేయాల్సిన పనులను సరైన కారణం లేకుండా వాయిదా వేస్తున్నారని స్థానికులు ఆరోపిస్తున్నారు. రహదారి విస్తరణ పనులను వేగవంతం చేయాలని ప్రయాణికులు డిమాండ్ చేస్తున్నారు.