E20 పెట్రోల్‌పై విమర్శలు 'పెయిడ్ క్యాంపెయిన్': కేంద్ర మంత్రి నితిన్ గడ్కరీ

E20 పెట్రోల్‌పై వస్తున్న విమర్శలను కేంద్ర రోడ్డు రవాణా, హైవేల శాఖ మంత్రి నితిన్ గడ్కరీ 'పెయిడ్ ప్రచారం'గా అభివర్ణించారు. 2022 నుంచి దేశంలో 4 కోట్ల కార్లు, 20 కోట్ల టూ వీలర్లు E20 ఇంధనంతో నడుస్తున్నాయని, ఇప్పటివరకు ఒక్క వాహనం పాడైనట్టు ఆధారాలు లేవని ఆయన అన్నారు. మూడు నెలల క్రితం ఇథనాల్‌పై పెద్ద హడావిడి జరిగిందని, ఇప్పుడు అదంతా ఆగిపోయిందని ఆయన పేర్కొన్నారు.

దిల్లీలో హైడ్రోజన్ బస్సులను పరిశీలిస్తూ మాట్లాడిన గడ్కరీ, హైడ్రోజన్ ఫ్యూయల్ సెల్, IC ఇంజిన్‌లో హైడ్రోజన్ నింపిన మూడు టాటా ట్రక్కులను తాజ్ ప్యాలెస్‌లో ప్రారంభించిన విషయాన్ని గుర్తు చేశారు. త్వరలో 10 రూట్లపై హైడ్రోజన్ ట్రక్కులు, హైడ్రోజన్ బస్సులు ప్రారంభమవుతాయని ఆయన తెలిపారు. ఫ్లెక్స్ ఇంజిన్ వాహనాలను టాటా, మహీంద్రా, టయోటా, హ్యుందాయ్ సంస్థలు ఇప్పటికే తీసుకొస్తున్నాయని చెప్పారు. ఇథనాల్, మిథనాల్, బయోడీజల్, LNG, CBG, హైడ్రోజన్‌తో పాటు విమాన ఇంధనాన్ని కూడా బయో ఆధారితంగా తయారు చేస్తున్నట్టు ఆయన వివరించారు.

దేశం ఏటా ₹22 లక్షల కోట్ల విలువైన ఫాసిల్ ఫ్యూయల్ దిగుమతి చేసుకుంటోందని, ఆ డబ్బు రైతుల జేబుకు వెళ్తే గ్రామీణ ఆర్థిక వ్యవస్థ బలపడుతుందని గడ్కరీ అన్నారు. రైతులు 'ఇంధన దాతలు'గా మారితే గ్రామీణ ఆర్థిక వ్యవస్థ GDPలో వాటా ప్రస్తుత 12 శాతం నుంచి 22 శాతానికి పెరుగుతుందని, గ్రామాల్లో ఉద్యోగ అవకాశాలు పెరుగుతాయని ఆయన చెప్పారు.

జాతీయ రహదారులపై కొత్తగా AI ఆధారిత అడ్వాన్స్‌డ్ ట్రాఫిక్ మేనేజ్‌మెంట్ సిస్టమ్ (ATMS) ప్రవేశపెడుతున్నట్టు మంత్రి తెలిపారు. మొదటి దశలో 10,000 కిలోమీటర్ల పరిధిలో ఈ వ్యవస్థ ఏర్పాటు చేయనున్నారు. హెల్మెట్ పెట్టుకున్నారా లేదా, సీట్ బెల్ట్ కట్టారా లేదా, లేన్ డిసిప్లిన్ పాటించారా అనేది కెమెరాల ద్వారా గుర్తిస్తారు. అయితే గంటకు 120 కి.మీ వేగం వరకు ఎలాంటి నోటీసులు పంపవద్దని తాను ఆదేశాలు ఇచ్చినట్టు గడ్కరీ చెప్పారు.