నోవో నార్డిస్క్ వారానికి ఒకసారి వేసుకునే 'అవిక్లీ' ఇన్సులిన్ విడుదల

డెన్మార్క్‌కు చెందిన నోవో నార్డిస్క్ భారతదేశంలో 'అవిక్లీ' పేరుతో కొత్త ఇన్సులిన్ ఇంజక్షన్‌ని విడుదల చేసింది. ఇది వారానికి ఒకసారి మాత్రమే వేసుకునే Basal ఇన్సులిన్. టైప్ 1 మరియు టైప్ 2 మధుమేహ వ్యాధిగ్రస్తులకు దీన్ని ఉపయోగించవచ్చు.

ఇప్పటివరకు ఇన్సులిన్ తీసుకునే రోగులు రోజూ ఇంజక్షన్ తీసుకోవాల్సి వచ్చేది. కొత్త ఇంజక్షన్ వల్ల సంవత్సరానికి 365కి బదులు 52 ఇంజక్షన్లు సరిపోతాయి. నోవో నార్డిస్క్ చేసిన ఫేజ్ 3 క్లినికల్ ట్రయల్స్‌లో ఈ ఇంజక్షన్ రోజువారీ ఇన్సులిన్‌తో సమానమైన రక్తంలో చక్కెర స్థాయిల నియంత్రణ సామర్థ్యం చూపించింది.

ఈ ఇంజక్షన్ డిపో టెక్నాలజీతో తయారైంది. శరీరంలో ఇంజక్ట్ చేసిన తర్వాత ఆల్బుమిన్‌తో బంధించబడి, క్రమంగా విడుదలవుతుంది. దీని అర్ధ జీవిత కాలం 196 గంటలు (8 రోజులు). కాబట్టి వారం పాటు పనిచేస్తుంది. కానీ ఒకేసారి అధిక డోస్ ఇవ్వడం వల్ల హైపోగ్లైసీమియా (రక్తంలో చక్కెర బాగా తగ్గడం) ప్రమాదం ఉంటుంది. అందువల్ల డాక్టర్ సూచన, పర్యవేక్షణలో మాత్రమే తీసుకోవాలి.

ఈ ఇంజక్షన్‌ని టైప్ 1, టైప్ 2 డయాబెటిస్ ఉన్నవారికి మాత్రమే ఉపయోగించాలి. బరువు తగ్గడానికి, PCOS, లేదా ఇన్ఫర్టిలిటీ చికిత్సలకు పనిచేయదు. గర్భిణులపై ట్రయల్స్ ఇంకా జరగలేదు, కాబట్టి గర్భిణులు దీనిని తీసుకోవద్దు. పిల్లలకు కూడా ట్రయల్స్ పూర్తి కాలేదు. 60 ఏళ్లు పైబడిన వృద్ధుల్లో పూర్తిగా నిర్ధారణ కాలేదు, కాబట్టి వైద్య సలహా మేరకు మాత్రమే వాడాలి.

ఒక డోస్‌లో 700 యూనిట్ల ఇన్సులిన్ ఉంటుంది. ధర విషయంలో రోజువారీ ఇన్సులిన్ కంటే తక్కువ ఖర్చుతో అందుబాటులోకి రానుందని వైద్యులు చెప్తున్నారు. అయితే ఇది పూర్తి స్థాయిలో రోజువారీ ఇన్సులిన్ స్థానంలో రాదు. అడ్వాన్స్డ్ కేసుల్లో రోజువారీ డోస్ కూడా అవసరం అవుతుంది. ఈ కొత్త ఇంజక్షన్ కాంబినేషన్ థెరపీగా ఉపయోగపడుతుంది.