'IGNITE CELL': ఎన్టీఆర్ జిల్లా కలెక్టరేట్‌లో ప్రభుత్వ పథకాల సమాచార కేంద్రం

ఎన్టీఆర్ జిల్లా కలెక్టరేట్‌లో ప్రజా సమస్యల పరిష్కార వేదిక (PGRS)లో భాగంగా 'IGNITE CELL' పేరిట ప్రత్యేక సమాచార కేంద్రాన్ని ఏర్పాటు చేశారు. ఈ సెల్ ప్రభుత్వ పథకాలు, నైపుణ్య అభివృద్ధి, ఉపాధి అవకాశాలు, మహిళా సంక్షేమం తదితర విషయాలపై ప్రజలకు సమగ్ర సమాచారం అందిస్తోంది.

ప్రతి సోమవారం కలెక్టరేట్ ఆవరణలో వివిధ శాఖల స్టాళ్లు ఏర్పాటు చేస్తారు. నెలలో మొదటి వారం ప్రాథమిక రంగం, నైపుణ్య అభివృద్ధి, మహిళా సంక్షేమం, ఉపాధి అంశాలపై దృష్టి పెడతారు. రెండో వారం రవాణా, వ్యవసాయం, పశుసంవర్ధక, ఉద్యానవన శాఖలు; మూడో వారం సెరికల్చర్, అటవి, పర్యాటకం, వైద్య ఆరోగ్య శాఖల సేవలు; నాలుగో వారం ఇతర కార్పొరేషన్లు, ఇంధన శాఖ, ప్రభుత్వ పథకాలపై వివరాలు ఇస్తారు. సిబ్బంది అర్హతలు, దరఖాస్తు ప్రక్రియను వివరిస్తారు.

సంబంధిత పథకాలకు గ్రీవెన్స్ వచ్చే వారికీ ఇక్కడ సమాచారం అందుబాటులో ఉంటుంది. ఉపాధి కోరే వారి వివరాలు నమోదు చేసుకుంటారు. జిల్లా కలెక్టర్ లక్ష్మీసా ఈ కార్యక్రమం పురోగతిని ప్రత్యక్షంగా పర్యవేక్షిస్తున్నారు.

అధికారుల ప్రకారం, ఇప్పటి వరకు 10,000 మందికి పైగా ఈ IGNITE CELL ద్వారా సేవలు పొందారు. 'ఒక కుటుంబం ఒక పారిశ్రామిక వేత్త' లక్ష్యం, విజన్ 2047 వంటి ప్రభుత్వ లక్ష్యాలకు ఈ సెల్ తోడ్పడుతుందని వారు తెలిపారు.