ఎన్టీఆర్ జిల్లాలో బ్లాక్ స్పాట్లలో రోడ్డు ప్రమాదాలు 15% తగ్గాయి

ఎన్టీఆర్ జిల్లాలో బ్లాక్ స్పాట్ల వద్ద చేపట్టిన రహదారి భద్రత చర్యలతో ప్రమాదాలు 15 శాతం తగ్గాయని రవాణా శాఖ అధికారులు తెలిపారు. ఏప్రిల్ నుంచి జూలై వరకు నాలుగు నెలల డేటాను గతేడాది ఇదే కాలంతో పోల్చినట్లు వారు చెప్పారు.

2025 ప్రమాదాల డేటా ప్రకారం జిల్లాలో 123 బ్లాక్ స్పాట్లు ఉన్నట్లు గుర్తించారు. ఏప్రిల్ 10న జిల్లా రహదారి భద్రత కమిటీ అధికారులు బస్సు యాత్ర చేపట్టి 28 ప్రాంతాలను పరిశీలించారు. హెల్మెట్ లేకుండా ప్రయాణించడం, అతివేగం, అడ్డదిడ్డంగా దూసుకురావడం, రోడ్డు డిజైన్ లోపాలను అధికారులు గుర్తించారు.

స్వల్పకాలిక చర్యల్లో సైన్ బోర్డులు, రంబుల్ స్ట్రిప్స్ ఏర్పాటు చేశారు. సాయంత్రం 3 నుంచి రాత్రి 9 గంటల వరకు ప్రమాదాలు ఎక్కువగా జరుగుతున్నందున ఆ సమయంలో ఎన్ఫోర్స్మెంట్ పెంచారు. ఎన్జీఓల సహకారంతో అవగాహన కార్యక్రమాలు నిర్వహిస్తున్నారు.

లైసెన్సింగ్ విధానాన్ని కఠినతరం చేశారు. గన్నవరం ప్రాంతంలో ఆటోమేటెడ్ డ్రైవింగ్ టెస్ట్ ట్రాక్‌లో 100 మార్కులకు 60 మార్కులు సాధిస్తేనే ఉత్తీర్ణత. 18 ఏళ్లు నిండిన విద్యార్థులకు మాత్రమే బైకులు ఇవ్వాలని, లైసెన్స్ ధృవీకరించుకోవాలని స్కూల్ యాజమాన్యాలకు నోటీసులు ఇచ్చారు. రాష్ట్రంలో 1.94 కోట్ల వాహనాలు ఉన్నట్లు అధికారులు తెలిపారు.