జూనియర్ ఎన్టీఆర్-త్రివిక్రమ్ చిత్రం పోస్టర్ ట్యాగ్ లైన్‌పై వివాదం; NTK హెచ్చరిక

జూనియర్ ఎన్టీఆర్, త్రివిక్రమ్ కాంబినేషన్లో రూపొందుతున్న చిత్రం ఫస్ట్ లుక్ పోస్టర్‌పై తమిళనాడులో అభ్యంతరాలు వ్యక్తమవుతున్నాయి. 'గాడ్ ఆఫ్ వార్' అనే వర్కింగ్ టైటిల్‌తో ప్రచారంలో ఉన్న ఈ సినిమా పోస్టర్‌లో 'Born in North, worshipped in South' అనే ట్యాగ్ లైన్ ఉంది. ఈ లైన్‌ను తమిళనాడు రాజకీయ పార్టీ నామ్ తమిళర్ కచ్చి (NTK) తీవ్రంగా వ్యతిరేకిస్తోంది.

నిర్మాత నాగవంశీ 'ఉత్తరాదిలో జన్మించాడు, భారత్ హృదయంలో తీర్చిదిద్దబడ్డాడు, దక్షిణాదిలో ఆరాధించబడుతున్నాడు' అని ట్వీట్ చేయడం వివాదానికి దారితీసింది. తమిళనాడులో లార్డ్ మురుగన్‌ను తమిళ దైవంగా భావిస్తుండగా, ఆ దేవుడు ఉత్తర భారతానికి చెందినవాడిగా చూపించడం సరికాదని NTK నేత సీమాన్ అన్నారు. సినిమా ద్వారా తమిళుల విశ్వాసాలను దెబ్బతీయకూడదని, అలా చేస్తే పర్యవసానాలు ఎదుర్కోవాల్సి వస్తుందని ఆయన హెచ్చరించారు.

అయితే సీమాన్ వ్యాఖ్యలను ద్రవిడ దేశం చీఫ్ కృష్ణారావు ఖండించారు. గతంలోనూ సీమాన్ తెలుగు వారిని కించపరిచే వ్యాఖ్యలు చేశారని, ఆయన రాజకీయ గ్రాఫ్ పడిపోతోందని అన్నారు. సినిమా విషయంలో సీమాన్ ఎందుకు స్పందించాల్సిన అవసరం వచ్చిందని ప్రశ్నించారు.

ఈ వివాదంపై సినిమా టీం నుంచి ఇప్పటివరకు స్పందన రాలేదు. అసలు కథ ఏంటీ, పాత్ర ఎలా ఉంటుందనే వివరాలు కూడా వెల్లడించలేదు. పోస్టర్, నాగవంశీ ట్వీట్, జూనియర్ ఎన్టీఆర్ సోదరుడు కళ్యాణరామ్ పోస్ట్ ఆధారంగా సినిమా సుబ్రహ్మణ్య స్వామి చుట్టూ తిరిగే పురాణ ఇతిహాసం కావచ్చనే ఊహాగానాలు సోషల్ మీడియాలో వినిపిస్తున్నాయి. కానీ అధికారికంగా ఎలాంటి ప్రకటన రాలేదు.