ఎన్విడియా సీఈఓ జెన్సన్ హువాంగ్‌పై చైనా గూఢచారి సంబంధాల ఆరోపణలు

ఎన్విడియా సీఈఓ జెన్సన్ హువాంగ్‌కు చైనా గూఢచారి అలీస్ హువాంగ్‌తో సన్నిహిత సంబంధాలు ఉన్నాయని అమెరికా నిఘా సంస్థలు సిద్ధం చేసిన మెమోలో ఆరోపణలు ఉన్నాయి. ఈ మెమో వివరాలను అమెరికా అధికారులను ఉద్దేశించి Financial Times ప్రచురించింది.

అలీస్ హువాంగ్ సింగపూర్‌కు చెందిన Mega Speed కంపెనీలో ఎగ్జిక్యూటివ్‌గా పనిచేస్తున్నారు. ఆమెను చైనా అంతర్గత భద్రతా మంత్రిత్వ శాఖ (MSS) నియమించినట్లు అమెరికా నిఘా వర్గాలు గుర్తించినట్లు మెమోలో పేర్కొన్నారు. ఆమె చిప్ సాంకేతికతను చైనాకు అందించే అవకాశం ఉందని ఆరోపణలు ఉన్నాయి. ఏఐ, సైనిక రంగాల్లో అమెరికాతో పోటీ పడాలని చైనా భావిస్తోందని ఆ నివేదిక అంటోంది.

ఇది జాతీయ భద్రతకు సంబంధించిన అంశం కావడంతో తొలుత కొందరు సీనియర్ అధికారులే ఈ విషయాన్ని పరిశీలించినట్లు సమాచారం. గతేడాది మేలో బీజింగ్‌లో చైనా అధ్యక్షుడు జిన్‌పింగ్‌తో ట్రంప్ భేటీ సమయంలో ఈ పరిణామాలు జరిగినట్లు ఆ నివేదిక తెలిపింది. చైనాకు వెళ్లే బృందంలో జెన్సన్ లేరని తెలిసి ట్రంప్ స్వయంగా ఫోన్ చేసి ఆయనను తన విమానంలో తీసుకెళ్లినట్లు అందులో ఉంది.

2023లో ఒక చైనీస్ గేమింగ్ కంపెనీ నుంచి విడిపోయి Mega Speed ఏర్పడింది. అమెరికా చట్టాలను ఉల్లంఘించి ఎన్విడియా చిప్‌లను చైనాకు అక్రమంగా తరలిస్తున్నట్లు ఆరోపణలపై విచారణ జరిగింది. ఈ అంశంపై ఎన్విడియా గతంలో అంతర్గత విచారణ చేపట్టి, ఎలాంటి తప్పు జరగలేదని తేల్చింది.

గ్లోబల్ ఏఐ చిప్ మార్కెట్‌లో ఎన్విడియాకు 80 నుంచి 90 శాతం వాటా ఉంది. ఈ నేపథ్యంలో జెన్సన్ హువాంగ్‌పై అమెరికా యంత్రాంగం రహస్యంగా దర్యాప్తు చేస్తున్నట్లు అమెరికన్ మీడియా తెలిపింది. చైనా విదేశీ గూఢచార వ్యవహారాలను పరిశీలించే హౌస్ కమిటీల ముందు ఆయన రహస్యంగా హాజరు కావాలని రిపబ్లికన్ చట్టసభ సభ్యులు ఆదేశించారు.