ఆపరేషన్ హార్డ్‌బాల్: లారెన్స్ బిష్ణోయి, గోల్డీ బ్రార్‌తో సహా 37 మందిపై అమెరికా అభియోగాలు

భారత్ కేంద్రంగా పనిచేస్తున్న మూడు అంతర్జాతీయ నేర సంస్థలపై అమెరికా అత్యంత పెద్ద ఎత్తున చర్యలు చేపట్టింది. ఆపరేషన్ హార్డ్‌బాల్ పేరుతో FBI సహా బహుళ దేశాల దర్యాప్తు సంస్థలు సంయుక్తంగా నిర్వహించిన ఈ దాడుల్లో 37 మంది నిందితులపై అభియోగాలు నమోదు చేశారు. వీరిలో 24 మందిని ఇప్పటికే అరెస్టు చేయగా, ప్రస్తుతం భారత జైలులో ఉన్న గ్యాంగ్‌స్టర్ లారెన్స్ బిష్ణోయి, కెనడాలో ఉన్న గోల్డీ బ్రార్ కూడా ఉన్నారు. 2023లో కెనడాలో సిక్కు నాయకుడు హర్దీప్ సింగ్ నిజ్జర్ హత్య కేసులో వీరిద్దరి ప్రమేయాన్ని అమెరికా అభియోగాలు ధ్రువీకరించాయి.

అమెరికా న్యాయశాఖ మూడు వేర్వేరు నేరారోపణ పత్రాలు (indictments) విడుదల చేసింది. మొదటి ఆరోపణ పత్రం ప్రకారం, జైలు నుంచి అక్రమంగా మొబైల్ ఫోన్లు, ఇంటర్నెట్ సదుపాయం ఉపయోగించి లారెన్స్ బిష్ణోయి అంతర్జాతీయ నేర సామ్రాజ్యాన్ని నడిపాడు. ఉత్తర అమెరికా సహచరుడు గోల్డీ బ్రార్, యూరప్ నాయకుడు రూపీ గంధారా సహా ఏడుగురిపై రాకెటీరింగ్, కుట్ర ఆరోపణలు చేశారు. నిజ్జర్ హత్యతోపాటు లాస్‌ఏంజెల్స్ ప్రాంతంలో కొకైన్, మెతాంఫిటమైన్ ట్రాఫికింగ్, ప్రత్యర్థి గ్రూపుల నుంచి వందల పౌండ్ల డ్రగ్స్ చోరీ చేసినట్లు ఆరోపించారు.

రెండో అభియోగాలు జగ్గు భగవాన్‌పురియా నేతృత్వంలోని నెట్‌వర్క్‌పై. దాదాపు 1,000 మంది అనుచరులతో కొనసాగుతున్న ఈ గ్రూపు నార్కోటిక్స్ రవాణా, ఆయుధాల వ్యాపారం, హత్యల కోసం కాంట్రాక్టులు చేపట్టినట్లు ఆరోపణ. మూడో నెట్‌వర్క్ రవీందర్ సింగ్ దండ నేతృత్వంలో దక్షిణ కాలిఫోర్నియా నుంచి కెనడాకు సెమీ ట్రక్కులు, వ్యవసాయ వాహనాల ద్వారా వందల కిలోల కొకైన్, మెతాంఫిటమైన్ తరలించినట్లు FBI తెలిపింది.

నిందితులు శిక్ష పడితే కనీసం 10 సంవత్సరాల నుంచి జీవిత ఖైదు వరకు శిక్ష పడే అవకాశం ఉంది. అమెరికా, కెనడా, యూరప్‌ల్లో భారత వర్గాలను భయభ్రాంతులకు గురిచేస్తున్న ఈ నేర గ్రూపులకు చెక్ పెట్టడంలో ఆపరేషన్ హార్డ్‌బాల్ కీలక ముందడుగుగా FBI అభివర్ణించింది.