ఉత్తరాంధ్ర వరి పంటపై చీడపీడలు: నివారణ చర్యలు సూచించిన శాస్త్రవేత్త

ఉత్తరాంధ్రలో వరి పంటపై చీడపీడలు ఆశించాయి. ఇటీవలి వర్షాలు, పెరిగిన ఉష్ణోగ్రతలు దీనికి కారణమని శాస్త్రవేత్తలు గుర్తించారు. ముఖ్యంగా శ్రీకాకుళం జిల్లాలో తెగుళ్ల తీవ్రత పెరిగింది.

ఈ వివరాలను ఆముదాలవలస కృషి విజ్ఞాన కేంద్రం శాస్త్రవేత్త డాక్టర్ అనూష తెలిపారు. వరి పంట ప్రస్తుతం దుబ్బు దశ నుంచి చిరుపొట్ట దశలో ఉంది. సుడిదోమ, అగ్గి తెగులు, పొడ తెగులు, మెడవిరుపు తెగులు, మాగుడు తెగుళ్లు ఆశించే అవకాశం ఉంది. కొన్ని ప్రాంతాల్లో ఇవి ఇప్పటికే కనిపించాయి.

గోధుమ రంగు దోమ, తెల్ల దోమలు ఎక్కువగా వస్తాయి. ఇవి మొక్క మొదలు వద్ద రసం పీలుస్తాయి. దుబ్బుకు 10 నుంచి 15 దోమలు కనిపిస్తే మందు పిచికారి చేయాలి. ఈనక దశలో 20 నుంచి 25 దోమలు ఉంటే పిచికారి చేయాలని శాస్త్రవేత్త సూచించారు.

పైమెట్రోజిన్ 0.6 గ్రాములు లీటర్ నీటికి లేదా ఎకరానికి 120 గ్రాములు వాడాలి. డైనోటెఫిరాన్ ఎకరానికి 80 గ్రాములు. ట్రైఫ్లూమిజోపైరిం 0.48 మిల్లీలీటర్లు లీటర్ నీటికి లేదా ఎకరానికి 96 మిల్లీలీటర్లు వాడాలి. పిచికారికి ముందు పొలంలో నీరు తీసి ఆరబెట్టుకోవాలి. ఒక వారం తర్వాత మందు మార్చి మళ్లీ పిచికారి చేయాలి.

అగ్గి తెగులు, మెడవిరుపు తెగులకు ట్రైసైక్లోజోల్, ఐసోప్రోతయోలిన్, టెబుకోనజోల్ వంటి మందులు వాడాలి. పొడ తెగులు, మాగుడు తెగులకు హెక్సకోనజోల్, వాలిడామైసిన్ వంటి మందులు పిచికారి చేయాలి. గట్లపై కలుపు లేకుండా చూసుకోవాలని శాస్త్రవేత్త తెలిపారు.