పాకాల సరస్సు సరికొత్త రూపు: బోటింగ్, నైట్ క్యాంపింగ్, చిల్డ్రన్స్ పార్క్‌తో అద్భుతం

వరంగల్ జిల్లాలోని చారిత్రక పాకాల సరస్సు పర్యాటకులకు కొత్త అనుభూతులు ఇచ్చేలా సరికొత్త రూపు సంతరించుకుంది. పర్యాటక శాఖ ఇటీవల ఇక్కడ అనేక ఆధునిక సౌకర్యాలు కల్పించింది.

బయోడైవర్సిటీ పార్క్, హాయిగా బోటింగ్, రాత్రి బస చేసే నైట్ క్యాంపింగ్ సౌకర్యం ఇప్పటికే సందర్శకులను ఆకట్టుకుంటున్నాయి. ట్రెక్కింగ్, నేచర్ వాక్ వంటి ప్రత్యేక కార్యక్రమాలు కూడా అందుబాటులో ఉన్నాయి. పాకాల కట్ట దిగువన ఏర్పాటు చేసిన చిల్డ్రన్స్ పార్క్‌లో పిల్లలు ఆడుకోవడానికి ట్రాంఫోలిన్, జంపింగ్, రోప్ టైట్స్ వంటి ఆట వస్తువులు ఉన్నాయి. పక్కనే ఉన్న బటర్‌ఫ్లై గార్డెన్‌లో రంగురంగుల సీతాకోకచిలుకలను చూస్తూ సెల్ఫీలు దిగే సౌకర్యం కూడా కల్పించారు.

పక్షులు, వన్యమృగాలు, వివిధ వృక్షాలను వీక్షించే సఫారీ టూర్, సైకిల్ సవారీ కూడా మరో ఆకర్షణ. కట్ట దిగువన గణపతి దేవ వనమండపంలో ఫంక్షన్లు, ఫోటోషూట్‌లకు ఏర్పాట్లు చేశారు. పాకాలకు వచ్చే సందర్శకులు ఇప్పుడు ఈ అన్ని సౌకర్యాలతో ప్రకృతిలో సేద తీరవచ్చు.

స్థానిక పర్యాటకులు మాట్లాడుతూ, గత ఐదు నుండి ఎనిమిదేళ్ల క్రితం ఇక్కడ బోటింగ్ లాంటి సౌకర్యాలు లేవని, ఇప్పుడు బాగా అభివృద్ధి చెందిందని అభిప్రాయపడ్డారు. వచ్చే ఆదాయాన్ని తిరిగి ఇక్కడి అభివృద్ధికే వినియోగించాలని, ప్రత్యేక భద్రతా ఏర్పాట్లు చేయాలని కోరారు. అధికారులు మాత్రం ఇంకా అభివృద్ధి చేసేందుకు ప్రణాళికలు ఉన్నాయని, ప్రపంచ పర్యాటకులను ఆకర్షించే స్థాయికి తీసుకెళ్లే ఆలోచన ఉందని తెలిపారు.

పర్యావరణాన్ని కాపాడేందుకు సందర్శకులు ప్లాస్టిక్ వస్తువులు తేరాదని అధికారులు విజ్ఞప్తి చేశారు. అభివృద్ధి పనుల ద్వారా స్థానిక ప్రజలకు మెరుగైన భవిష్యత్తు లభిస్తుందని వారు ఆశాభావం వ్యక్తం చేశారు.