ములుగు జిల్లాలోని పాలంపేట శివాలయానికి జాతీయ ప్రాముఖ్యత హోదా

తెలంగాణలోని ములుగు జిల్లా పాలంపేట గ్రామంలో ఉన్న శివాలయానికి కేంద్ర ప్రభుత్వం జాతీయ ప్రాముఖ్యత హోదా కల్పించింది. ఈ ఆలయం ప్రసిద్ధ రామప్ప దేవాలయానికి సమీపంలో ఉంది.

కేంద్ర సాంస్కృతిక శాఖ ఈ నిర్ణయం తీసుకుంది. ఇకపై ఈ ఆలయం పూర్తిగా భారతీయ పురావస్తు శాఖ (ASI) పర్యవేక్షణలో ఉంటుంది. నేషనల్ మాన్యుమెంట్స్ అథారిటీ ప్రత్యేక రక్షణ చర్యలు కూడా కొనసాగుతాయి. ఆలయ నిర్మాణ శైలి దెబ్బతినకుండా పురాతన కట్టడాల పరిరక్షణ చట్టాల ప్రకారం అభివృద్ధి పనులు జరుగుతాయి.

కేంద్ర పర్యాటక శాఖ మంత్రి కిషన్ రెడ్డి ఎక్స్ (ట్విట్టర్) వేదికగా ఈ విషయాన్ని ప్రకటించారు. రామప్ప ఆలయ పరిసరాల్లో ఉన్న మరో ఉపాలయం గొల్లాల గుడికి కూడా జాతీయ ప్రాముఖ్యత లభించిందని తెలిపారు. దీంతో తెలంగాణలో కేంద్ర ప్రభుత్వ రక్షణలో ఉన్న స్మారక కట్టడాల సంఖ్య 10కి చేరింది.

ఈ నిర్ణయం వల్ల పాలంపేట శివాలయం రూపురేఖలు మారి పర్యాటక, ఆధ్యాత్మిక కేంద్రంగా అభివృద్ధి చెందనుంది. ఇప్పటివరకు సరైన నిధులు లేక వెలుగులోకి రాలేకపోయిన ఈ ప్రాచీనాలయానికి ఇది కొత్త గుర్తింపు తెచ్చింది.