పార్లమెంట్ సమావేశాలు ప్రోరోగ్ కాకుండా 88 రోజులు.. కొత్త రికార్డు

పార్లమెంట్ వర్షాకాల సమావేశాలు ఆగస్టు 13న నిర్వధికంగా వాయిదా పడ్డాయి. అప్పటి నుంచి 88 రోజులు గడిచినా ఉభయ సభలను ప్రోరోగ్ చేయలేదు. దీంతో పార్లమెంట్ చరిత్రలో కొత్త రికార్డు నమోదైంది.

2008లో నమోదైన 87 రోజుల రికార్డును ఈసారి అధిగమించారు. లోక్‌సభ, రాజ్యసభలను ప్రోరోగ్ చేస్తున్నట్లు ఇప్పటివరకు ఎలాంటి అధికారిక ప్రకటన రాలేదు.

ప్రస్తుత వర్షాకాల సమావేశాల్లో భాగంగానే ప్రత్యేక భేటీ నిర్వహించే అవకాశం ఉందని చర్చ సాగుతోంది. మహిళా రిజర్వేషన్లతో ముడిపడిన ప్రతిపాదిత రాజ్యాంగ సవరణ బిల్లును పరిశీలించేందుకు స్వల్ప నోటీసుతో పార్లమెంట్‌ను సమావేశపరచే వ్యూహమే ఇదని ఊహాగానాలు వినిపిస్తున్నాయి.

ఈ బిల్లు నియోజకవర్గాల పునర్విభజన ద్వారా లోక్‌సభ స్థానాలను 543 నుంచి గరిష్టంగా 850కి పెంచాలని ప్రతిపాదిస్తోంది. గత ఏప్రిల్ 17న బడ్జెట్ సమావేశాల ప్రత్యేక భేటీలో ఇలాంటి రాజ్యాంగ సవరణ బిల్లుకు లోక్‌సభలో తగినంత సంఖ్యాబలం లభించలేదు.

నిబంధనల ప్రకారం సాధారణ సమావేశాలు ఏర్పాటు చేయాలంటే కనీసం 14 రోజుల ముందు నోటీసు ఇవ్వాలి. పాత సమావేశాలను అధికారికంగా ముగించకుండా అందులోనే ప్రత్యేక భేటీ నిర్వహిస్తే రెండు రోజుల నోటీసు సరిపోతుంది.

సభ వాయిదా పడిన తర్వాత ఎన్ని రోజుల్లో ప్రోరోగ్ చేయాలని రాజ్యాంగంలో ఎలాంటి నిర్దిష్ట గడువు లేదు. ఎక్కువ కాలం ప్రోరోగ్ చేయకపోవడం నిబంధనల ఉల్లంఘన కిందకు రాదు.

గత రికార్డుల ప్రకారం 2008లో 87 రోజులు, 1987లో 76 రోజులు, 1989లో 54 రోజులు ప్రోరోగ్ లేకుండా ఉంచారు. 2006, 2013లో 49 రోజులు, 1963లో 41 రోజులు ఇలాగే కొనసాగాయి.