పావలా శ్యామలా ఎర్రగడ్డ ఆసుపత్రి ఆవరణలో గుర్తింపు, అనాథ ఆశ్రమానికి తరలింపు

ప్రముఖ సినీ నటి పావలా శ్యామలా (80) హైదరాబాద్ ఎర్రగడ్డలోని ఛాతీ ఆసుపత్రి ఆవరణలో కనిపించారు. ఆమెతో పాటు కుమార్తె కూడా ఉన్నారు.

గుర్తు తెలియని వ్యక్తులు వీరిని ఆసుపత్రి వద్ద వదిలి వెళ్లారు. ఆసుపత్రి సిబ్బంది ఆమెను గుర్తించి, సూపరింటెండెంట్ డాక్టర్ శ్రవణ్ కుమార్‌కు సమాచారం అందించారు. వారికి క్షయ పరీక్షలు చేయగా, ఆ వ్యాధి లేదని తేలింది. ఇతర అనారోగ్య సమస్యలతో ఉన్నందున వారిని ఉస్మానియా ఆసుపత్రికి తరలించారు. అయితే, అక్కడ ఉండలేకపోతున్నామని వారు తిరిగి ఛాతీ ఆసుపత్రికి వచ్చారు.

పావలా శ్యామలా తెలుగు సినిమాల్లో సుమారు 300కు పైగా చిత్రాల్లో నటించారు. చిన్న చిన్న పాత్రలతో ప్రేక్షకులకు దగ్గరైన ఆమె చాలాకాలంగా ఆర్థిక ఇబ్బందులతో బాధపడుతున్నారు.

తిరిగి ఛాతీ ఆసుపత్రికి రావడంతో, అధికారులు బోరబండ పోలీసులకు సమాచారం ఇచ్చారు. శుక్రవారం పోలీసు రక్షణతో ఆమెను, కుమార్తెను నగరంలోని ఒక అనాథ ఆశ్రమానికి తరలించారు.