పెద్ది సుదర్శన్ రెడ్డికి గుండెపోటు: పరిస్థితి విషమం, మృతిపై అనిశ్చితి

నర్సంపేట మాజీ ఎమ్మెల్యే పెద్ది సుదర్శన్ రెడ్డి ఆదివారం ఉదయం గుండెపోటుకు గురయ్యారు. హనుమకొండలోని తన నివాసంలో ఉదయం 7:30 గంటల ప్రాంతంలో ఆయన అస్వస్థతకు గురైనట్లు తెలిసింది.

కుటుంబ సభ్యులు వెంటనే ఆయనను హనుమకొండలోని రోహిణి ఆస్పత్రికి తరలించారు. వైద్యులు అత్యవసర చికిత్స చేపట్టి సీపీఆర్ ప్రయత్నం కొనసాగిస్తున్నారు. కానీ శరీరం స్పందించడం లేదని వైద్య వర్గాలు చెబుతున్నాయి.

మాజీ మంత్రి హరీష్ రావు ఈ విషయం తెలుసుకుని హాస్పిటల్ వైద్యులతో మాట్లాడారు. మెరుగైన వైద్యం అందించాలని సూచించారు.

పెద్ది సుదర్శన్ రెడ్డి తెలంగాణ ఉద్యమకారుడిగా, బీఆర్ఎస్ పార్టీ సీనియర్ నాయకుడిగా ఉన్నారు. 2018లో నర్సంపేట నియోజకవర్గం నుంచి ఎమ్మెల్యేగా గెలిచారు. ఉమ్మడి వరంగల్ జిల్లా బీఆర్ఎస్ అధ్యక్షుడిగా కూడా పనిచేశారు.

ఆస్పత్రిలో చికిత్స పొందుతుండగా, ఆయన మృతి చెందినట్టు సోషల్ మీడియాలో వార్తలు వచ్చాయి. అయితే ఈ వార్తలను వైద్యులు అధికారికంగా నిర్ధారించలేదు. కుటుంబ సభ్యులు, పార్టీ నాయకత్వంతో చర్చించిన తర్వాతే అధికారిక ప్రకటన చేస్తామని ఆస్పత్రి వర్గాలు తెలిపాయి.