అమర్‌నాథ్ యాత్ర భక్తులకు ప్రధాని మోదీ ఐదు సంకల్పాల విజ్ఞప్తి

అమర్‌నాథ్ యాత్రకు వెళ్లే భక్తులను ఉద్దేశించి ప్రధాని నరేంద్ర మోదీ ఒక లేఖ విడుదల చేశారు. ఆ లేఖలో ఐదు సంకల్పాలు చేపట్టాలని ఆయన భక్తులను కోరారు.

మొదటి సంకల్పంగా యాత్ర మార్గంలో చెత్త వేయకుండా పరిశుభ్రత పాటించాలి. ప్లాస్టిక్ వస్తువులు, తినుబండారాల వ్యర్థాలు ఎక్కడపడితే అక్కడ వేయవద్దని, ప్రకృతిని కాపాడాలని సూచించారు.

రెండవదిగా భద్రతా నిబంధనలు కచ్చితంగా పాటించాలి. అక్కడి వాతావరణం క్షణాల్లో మారుతుంది కాబట్టి భద్రతా సిబ్బంది ఇచ్చే హెచ్చరికలను పట్టించుకోవాలి. వర్షం పడితే జారిపడే అవకాశం ఉంటుంది, గుర్రం మీద ప్రయాణించేటప్పుడు జాగ్రత్తలు తీసుకోవాలని తెలిపారు.

మూడో సంకల్పం స్థానిక ఉత్పత్తులకు ప్రాధాన్యత ఇవ్వడం. యాత్ర సీజన్లో జమ్మూకశ్మీర్ ప్రజలకు ఆదాయం సమకూరుతుందని, తమ బడ్జెట్లో 10% స్థానిక ఉత్పత్తుల కొనుగోలుకు కేటాయించాలని ప్రధాని విజ్ఞప్తి చేశారు.

నాలుగో సంకల్పం ఒక మొక్కను బహుమతిగా ఇవ్వడం. ఆగస్టు 28న రక్షాబంధన్ రోజున సోదరుడు లేదా సోదరికి మొక్క ఇవ్వాలని, ‘తల్లి పేరుతో ఒక చెట్టు’ ఉద్యమానికి మద్దతు ఇవ్వాలని కోరారు.

ఐదో సంకల్పం ‘దేశమే ప్రథమం’ స్ఫూర్తితో దేశ అభివృద్ధికి పాటుపడడం. ప్రతి పౌరుడు తన విధులను నిజాయితీగా నిర్వర్తిస్తూ దేశాభివృద్ధికి కృషి చేయాలని ఆయన అన్నారు. అమర్‌నాథ్ యాత్ర ఈ నెల 28న ముగుస్తుంది.