నేషనల్ హ్యాండ్‌లూమ్ డే: Gen Z కోసం PM మోదీ Instagram లో GRWM వీడియో చేయాలని పిలుపు

ప్రధాని నరేంద్ర మోదీ ఆగస్టు 7న జాతీయ చేనేత దినోత్సవం సందర్భంగా Gen Z ని ఉద్దేశించి ప్రత్యేక Instagram వీడియో విడుదల చేశారు. సోషల్‌మీడియా వినియోగదారులు తమకిష్టమైన చేనేత వస్త్రాలు, ఉత్పత్తులతో Get Ready With Me (GRWM) వీడియోలు చేసి #NationalHandloomDay హ్యాష్‌ట్యాగ్‌తో పోస్ట్ చేయాలని ఆయన కోరారు. భారత చేనేత వైవిధ్యాన్ని ప్రపంచానికి పరిచయం చేయడమే లక్ష్యంగా ఈ ప్రచారాన్ని ప్రారంభించారు.

స్వాతంత్య్రోద్యమంలో 1905 ఆగస్టు 7న స్వదేశీ ఉద్యమం ప్రారంభమైన రోజునే ప్రభుత్వం జాతీయ చేనేత దినంగా ప్రకటించింది. ఈ చారిత్రక నేపథ్యాన్ని గుర్తుచేస్తూ, "7 ఆగస్టు 1905న భారత స్వాతంత్య్ర పోరాటంలో స్వదేశీ ఉద్యమం మొదలైంది. చేనేత రంగం ఆత్మనిర్భర భారతానికి పునాది" అని మోదీ వీడియోలో పేర్కొన్నారు.

దేశవ్యాప్తంగా ఉన్న చిన్న చేనేత కుటుంబాలు, నేత కార్మికుల ఆర్థిక స్థితిని మెరుగుపరిచేందుకు ప్రతి ఒక్కరూ చేనేత వస్త్రాలు కొనుగోలు చేయాలని ప్రధాని విజ్ఞప్తి చేశారు. ఫ్రెండ్‌షిప్ డే లాగానే హ్యాండ్‌లూమ్ డేను కూడా అదే ఉత్సాహంతో జరుపుకోవాలని ఆయన అన్నారు. "చేనేత ఉత్పత్తులతో GRWM వీడియోలు చేసి ప్రపంచానికి మన వైవిధ్యాన్ని చూపించండి" అని పిలుపునిచ్చారు.

కేంద్ర ప్రభుత్వం గత కొన్నేళ్లుగా చేనేత రంగాన్ని ప్రోత్సహించేందుకు అనేక పథకాలు అమలు చేస్తోంది. ఈ ఏడాది Gen Z ని ఆకర్షించేలా డిజిటల్ ప్రచారం చేపట్టడం గమనార్హం. యువత ఎక్కువగా ఉపయోగించే Instagram వేదికగా ఈ మెసేజ్‌ను ఇవ్వడం రాజకీయంగానూ కొత్త ట్రెండ్‌గా మారింది. ఇప్పటికే రాహుల్ గాంధీ కూడా Gen Z ప్రశ్నలకు Instagram లో సమాధానాలు ఇచ్చారు.

చేనేత రంగం దేశంలో కోట్లాది మందికి ఉపాధి కల్పిస్తోంది. ఈ ప్రచారం ద్వారా యువతలో చేనేతపై ఆసక్తి పెరిగి, నేత కార్మికుల ఆదాయానికి ఊతం లభిస్తుందని అధికారులు భావిస్తున్నారు. ఆగస్టు 7 నాడు దేశవ్యాప్తంగా వివిధ కార్యక్రమాలు నిర్వహించనుండగా, సోషల్‌మీడియాలో #NationalHandloomDay ట్రెండ్ కానుంది.