ప్రంబనన్ ఆలయ పునర్నిర్మాణం ప్రారంభం: సంస్కృతి భారత్-ఇండోనేసియాను కలిపిందన్న ప్రధాని మోదీ

ఇండోనేసియా పర్యటనలో భాగంగా యోగ్యకార్తాలోని ప్రసిద్ధ ప్రంబనన్ ఆలయ సముదాయంలో ప్రధాన మంత్రి నరేంద్ర మోదీ బుధవారం ప్రత్యేక పూజలు నిర్వహించి, ఆలయ పునర్నిర్మాణ పనులను ప్రారంభించారు. ఈ సందర్భంగా ఆయన మాట్లాడుతూ, భారతదేశం, ఇండోనేసియా మధ్య సాంస్కృతిక సంబంధాలు ఎంతో లోతైనవని, ఈ ఆలయం రెండు దేశాల మధ్య ఉన్న ఆధ్యాత్మిక అనుబంధానికి నిదర్శనమని అన్నారు.

సుమారు 1200 సంవత్సరాల పురాతనమైన ఈ శివ, దుర్గ, గణేశ ఆలయం UNESCO ప్రపంచ వారసత్వ జాబితాలో ఉన్నది. ప్రధాని మోదీ తన ప్రసంగంలో, తన జన్మస్థలమైన వడ్‌నగర్‌లోని హటకేశ్వర్ మహాదేవ్ ఆలయం, సోమనాథ్ జ్యోతిర్లింగం, కాశీ విశ్వనాథ్, కేదార్‌నాథ్, మహాకాల్ ఆలయాలతో తనకున్న అనుబంధాన్ని గుర్తు చేసుకున్నారు. "నేను ఎక్కడికి వెళ్లినా శివుడితో అనుసంధానం అవుతూనే ఉంటుంది. ఈ ఆలయంలో అడుగుపెట్టగానే మహామృత్యుంజయ జపం, ఓం నమః శివాయ అనే నినాదాలు నా హృదయాన్ని తాకాయి" అని ఆయన ఆవేదన వ్యక్తం చేశారు.

ఇండోనేసియా ప్రజలు ఈ ప్రాచీన ఆలయాన్ని ఎంతో శ్రద్ధగా, భక్తిగా సంరక్షించుకున్నందుకు ఆయన కృతజ్ఞతలు తెలిపారు. ఇండోనేసియా అధ్యక్షుడు ప్రబోవో సుబియాంటోతో కలిసి ఆలయ పునర్నిర్మాణానికి శంకుస్థాపన చేసిన మోదీ, ఈ ప్రాజెక్టు 2029 నాటికి పూర్తి చేస్తామని ప్రబోవో హామీ ఇచ్చారని, తాను కూడా తిరిగి వచ్చి ప్రారంభోత్సవంలో పాల్గొంటానని ప్రకటించారు. "మీరు సైనికుడిలా ప్రణాళిక వేసి సమయానికి ముందే పూర్తి చేస్తారని నమ్ముతున్నాను" అని ప్రధాని సరదాగా చెప్పారు.

భారత్, ఇండోనేసియా మధ్య స్నేహం మరింత బలోపేతం కావడానికి, రెండు దేశాల ప్రజల సంక్షేమానికి ప్రార్థించినట్లు తెలిపిన మోదీ, ఇండోనేసియా పర్యటన మొత్తం తనకు అపూర్వమైన అనుభూతిని ఇచ్చిందన్నారు. ఈ పర్యటనలో భారత-ఇండోనేసియా సాంస్కృతిక బంధం మరింతగా వెలుగులోకి వచ్చిందని విశ్లేషకులు భావిస్తున్నారు.