న్యూజిలాండ్ పర్యటనలో PM మోదీ 25-30 ఏళ్ల క్రితం నాటి మఫ్లర్‌ను ప్రదర్శించారు

ప్రధాని నరేంద్ర మోదీ తన న్యూజిలాండ్ పర్యటనలో భాగంగా ఆక్లాండ్‌లో భారత సంతతి ప్రజలతో మాట్లాడారు. ఈ సందర్భంగా ఆయన 25-30 ఏళ్ల క్రితం నాటి ఒక ప్రత్యేకమైన జ్ఞాపకాన్ని పంచుకున్నారు. ప్రధానిగా ఇది తన తొలి న్యూజిలాండ్ పర్యటన అని, అయితే 25-30 ఏళ్ల క్రితం తాను ఏ ప్రభుత్వంలోనూ లేనప్పుడు, సార్వజనిక జీవితంలో ఎవరికీ తెలియని రోజుల్లో కూడా న్యూజిలాండ్ వచ్చానని చెప్పారు. అప్పుడు ఇక్కడి ఒక స్నేహితుడు తనకు మూడు బహుమతులు ఇచ్చాడని, అవి ఒక మఫ్లర్, ఒక టోపీ, చేతి తొడుగులు అని తెలిపారు. ఆ సమయంలో చలికాలం కావడంతో ఆ వస్తువులు ఇచ్చారని వివరించారు. ఆ మూడింటిలో మఫ్లర్‌ను మాత్రం తాను ఇప్పటికీ జాగ్రత్తగా దాచుకున్నానని, ఈ కార్యక్రమానికి కూడా తీసుకువచ్చానని చెప్పారు. 'ఈ మఫ్లర్‌ను మీరు చూస్తున్నారు. ఇది 25-30 ఏళ్ల క్రితం న్యూజిలాండ్‌లోని ఒక స్నేహితుడు ఇచ్చారు. ఇన్నేళ్లలో ఎన్నోసార్లు వాడాను. మీ ప్రేమను ఎలా కాపాడుకుంటానో అలాగే దీన్ని కూడా కాపాడుకున్నాను' అని మోదీ చెప్పారు. ఈ వ్యాఖ్యలతో ప్రేక్షకుల్లో ఉత్సాహం నెలకొంది. ప్రధాని మోదీ ఈ మఫ్లర్‌ను ధరించి ప్రసంగించడం గమనార్హం.