మంచిర్యాల జిల్లా చెన్నూరులో పోలీసుల కార్డన్ సెర్చ్‌; 20 ద్విచక్ర వాహనాలు, 2 ఆటోలు సీజ్

మంచిర్యాల జిల్లా చెన్నూరు మండలం తుర్కపల్లి గ్రామంలో పోలీసులు భారీ కార్డన్ సెర్చ్ నిర్వహించారు. కమ్యూనిటీ కాంటాక్ట్ కార్యక్రమంలో భాగంగా ఇళ్లల్లో తనిఖీలు చేసి, సరైన పత్రాలు లేని 20 ద్విచక్ర వాహనాలు, రెండు ఆటోలను స్వాధీనం చేసుకున్నారు.

చెన్నూరు సీఐ బన్సీలాల్ మాట్లాడుతూ, గ్రామాన్ని గుడుంబ రహితంగా మార్చేందుకు గ్రామస్తులు సహకరించాలని సూచించారు. మద్యం సేవించి వాహనాలు నడిపే వారిపై కఠిన చర్యలు తీసుకుంటామని హెచ్చరించారు. సైబర్ నేరాల బారిన పడకుండా అపరిచితుల మెసేజ్‌లు, లింక్‌ల పట్ల జాగ్రత్తగా ఉండాలని వివరించారు.

ఈ సందర్భంగా మహిళలు, యువత, విద్యార్థుల కోసం ప్రత్యేక అవగాహన కార్యక్రమం నిర్వహించారు. ట్రాఫిక్ నిబంధనలు, చెడు అలవాట్లు, సైబర్ మోసాలపై వివరణ ఇచ్చారు. స్థానికులు పోలీసులకు సహకరించాలని కోరారు.